Serbiya prezidenti Aleksandar Vuchich Kosovo shimolidagi vaziyat munosabati bilan mamlakat armiyasini to‘liq jangovar shaylik holatiga o‘tkazdi. Bu haqda “Kommersant” xabar bermoqda.
Serbiya va Kosovo chegarasidagi vaziyat 29 sentyabr, shanba kuni Kosovo maxsus bo‘linmalarining o‘nlab jangchilari “Gazivode” gidroelektr stansiyasini suv bilan ta’minlovchi ko‘lga yondosh hududga kirib kelganidan so‘ng keskinlashdi.
GESning aksariyat qismi Kosovo hududida joylashgan bo‘lsa-da, u Serbiya energiya tizimining tarkibiy qismi hisoblanadi. Kosovo maxsus bo‘linma jangchilari Kosovo shimolidagi Zubin-Potok shahridagi Ekologiya va sport markazini ham egallagan — bu shaharda asosan serblar istiqomat qiladi.
RTS telekanali ma’lumotlariga ko‘ra, hozircha Serbiya va Kosovo chegarasida hech qanday to‘qnashuvlar yuz bermagan.
Sentyabr oyi boshida Aleksandar Vuchich Kosovo shimoliga tashrif buyurib, mahalliy serblar oldida chiqish qilgandi. Kosovo yetakchisi Hoshim Tachi bilan muzokaralar yo‘qqa chiqqan bo‘lsa-da, Serbiya prezidenti munosabatlarni normallashtirish uchun rasmiy Prishtina bilan muloqotni davom ettirishga tayyorligini bildirgan edi.
Izoh (0)