Сербия президенти Александар Вучич Косово шимолидаги вазият муносабати билан мамлакат армиясини тўлиқ жанговар шайлик ҳолатига ўтказди. Бу ҳақда «Коммерсантъ» хабар бермоқда.
Сербия ва Косово чегарасидаги вазият 29 сентябр, шанба куни Косово махсус бўлинмаларининг ўнлаб жангчилари «Газиводе» гидроэлектр станциясини сув билан таъминловчи кўлга ёндош ҳудудга кириб келганидан сўнг кескинлашди.
ГЕСнинг аксарият қисми Косово ҳудудида жойлашган бўлса-да, у Сербия энергия тизимининг таркибий қисми ҳисобланади. Косово махсус бўлинма жангчилари Косово шимолидаги Зубин-Поток шаҳридаги Экология ва спорт марказини ҳам эгаллаган — бу шаҳарда асосан серблар истиқомат қилади.
RTS телеканали маълумотларига кўра, ҳозирча Сербия ва Косово чегарасида ҳеч қандай тўқнашувлар юз бермаган.
Сентябр ойи бошида Александар Вучич Косово шимолига ташриф буюриб, маҳаллий серблар олдида чиқиш қилганди. Косово етакчиси Ҳошим Тачи билан музокаралар йўққа чиққан бўлса-да, Сербия президенти муносабатларни нормаллаштириш учун расмий Приштина билан мулоқотни давом эттиришга тайёрлигини билдирган эди.
Изоҳ (0)