Toshkentda ichki ishlar xodimining xizmat kiyimini kiyib, firibgarlikka qo‘l urgan Bekzod Odilbekov va uning sherigi Anvarxo‘ja Shoisayev qo‘lga olindi. Bu haqda “Toshkent” telekanalining “Poytaxt-vaziyat” dasturida ma’lum qilindi, deya xabar beradi O‘zA.
Ular joriy yil 28-fevral kuni soat 16:30 larda Mirobod tumani hududidagi “Bolajon” istirohat bog‘iga keladi va shu yerda sayr qilib yurgan Hakimov hamda Yusupovaning oldiga borib, ularni so‘roqqa tutadi. Maqsad po‘pisa qilish orqali pul ishlab olish edi. Aynan shuning uchun jamoat joyida behayo harakatlarni sodir etganlik bilan tuhmat qilib, bu haqda ular yashaydigan mahallada muhokama qilmaslik evaziga pul talab qiladi.
Jabrlanuvchilar murojaati bo‘yicha huquqni muhofaza qiluvchi organlar xodimlarining tezkor tadbirlari o‘tkazildi. Natijada Odilbekov va Shoisayev 80 ming so‘m olgan vaqtida ushlandi.
Mazkur holat yuzasidan Toshkent shahar IIBB huzuridagi Tergov boshqarmasi tomonidan bilan jinoyat ishi qo‘zg‘atildi. Hozirda dastlabki tergov harakatlari davom ettirilib, ularning boshqa jinoyatlarga aloqadorligi tekshirilmoqda.
Izoh (0)