Farg‘ona viloyatining Bog‘dod tumani istirohat bog‘ida “Aziz va yagonamsan, jonajon O‘zbekistonim!” shiori ostida O‘zbekiston mustaqilligining 27 yilligiga bag‘ishlangan xalq sayli bo‘lib o‘tdi. Bu haqda O‘zA xabar bermoqda.
Tadbir doirasida tashkil etilgan mehnat yarmarkasida 200 dan ortiq korxona va tashkilot 867 bo‘sh ish o‘rni bilan ishtirok etdi. Yarmarkada O‘zbekiston yoshlar ittifoqi Bog‘dod tuman kengashi tomonidan karvin san’ati bo‘yicha mashg‘ulotlar o‘tkazildi. Shuningdek, ishtirokchilar “Yoshlar — kelajagimiz” Davlat dasturining mazmun-mohiyati va ahamiyati, kredit olish tartibi, Ittifoqning yoshlarni qo‘llab-quvvatlashga qaratilgan loyihalari bilan tanishdi.
Tuman bandlik va mehnat munosabatlari bo‘limining jamoat ishlarini tashkil etish punkti tomonidan 70 dan ziyod xotin-qizga ishga yo‘llanma berildi. Ularning 35 nafari ta’lim maskanlariga ishga joylashdi.
Shu kuni tuman markaziy stadionida yoshlarni vatanparvarlik ruhida tarbiyalash, ularning harbiy xizmatga qiziqishi va intilishini kuchaytirish, Qurolli Kuchlar qudratini namoyon etishga qaratilgan tadbir bo‘lib o‘tdi. Iqtidorli yosh sportchilar o‘z mahoratini namoyish etdi.
Izoh (0)