Toshkent shahar hokimligida O‘zbekiston mustaqilligining 27 yilligi arafasida “Mening Toshkentim” tanlovi gʻoliblarini taqdirlash marosimi boʻlib oʻtdi. Bu haqda O‘zA xabar bermoqda.
Shahar hokimligi masʼullari, davlat va jamoat tashkilotlari vakillari va tanlov sovrindorlari ishtirok etgan tadbirda jamiyatda aholining ijtimoiy faolligini oshirish, bugungi boʻlayotgan oʻzgarishlarda ishtirok etishini taʼminlash muhim ahamiyatga ega ekani alohida taʼkidlandi.
Joriy yilning iyul oyida eʼlon qilingan tanlovning asosiy maqsadi poytaxt aholisining ona shahriga boʻlgan muhabbatni yanada oshirish, faxr va vatanparvarlik tuygʻularini shakllantirish, bugungi bunyodkorlik hamda keng qamrovli oʻzgarishlarni koʻrsatishdan iboratdir. Tanlovda qatnashgan professional va havaskorlar oʻzining 400 dan ortiq ijodiy ishlari bilan ishtirok etdi. Hakamlar hayʼati aʼzolari tomonidan gʻolib va sovrindorlarni tanlashda ishtirokchilarning mavzuga yondashuvi, ijodiy mahoratiga alohida eʼtibor qaratildi. Ovoz berish natijalariga koʻra, “Kreativ surat” nominatsiyasida S. Saidova, “Eng yaxshi surat” nominatsiyasida A. Kixayeva, Toshkent haqida “Eng yaxshi maqola” nominatsiyasida S. Yakupov, “Eng yaxshi panorama” yoʻnalishi boʻyicha Z. Gʻafforov, “Men va mening shahrim” mavzusidagi “Eng yaxshi selfi” nominatsiyasida esa A. Kalashnikovalar gʻolib boʻldi.
Tadbirda tanlovga taqdim etilgan eng yaxshi fotosuratlar koʻrgazmasi namoyish qilindi. Tashkilotchilar tomonidan gʻolib va sovrindorlarga diplom va esdalik sovgʻalari topshirildi.
Izoh (0)