Shahrisabzning Duqchi mahallasida Osiyo taraqqiyot bankining millionlab mablag‘i evaziga bunyod etilgan ichimlik suv inshootidan sakkiz yildan buyon foydalanilmayapti, deb yozadi “Xalq so‘zi”.
Shahrisabz tumanidagi Duqchi ichimlik suv havzasi ushbu mahalladagi 6 mingdan oshiq aholiga ichimlik suvi yetkazib berishga mo‘ljallangan edi. Lekin qurilganidan buyon qariyb foydalanilmagan bu inshoot tashlandiq holga kelib qolgan.
“Inshoot qurilishi boshlanganidan buyon shu yerda ishlayman. Suv havzasi foydalanishga topshirilgandan keyin 2010-yil boshida 2—3 oy ishlab, to‘xtab qolgan. O‘shanda 22 kilometr ichimlik suv liniyasi tortilgan edi. Quvurlar bosimga dosh berolmay yorilib ketdi. Shuning uchun liniyada bosim bo‘lmay suvni uzata olmadi. O‘ylaymanki, qurilish ishlari pala-partish va aniq hisob-kitoblar asosida amalga oshirilmagan”, — deydi viloyat “Suvoqova” boshqarmasi Shahrisabz tuman filiali “Duqchi” ichimlik suv ishlab chiqarish va uzatish havzasi ishchisi Sa’dilla Almardonov.
Mahalla fuqarolar yig‘ini raisi Sherali Baratovning ta’kidlashicha, suv quvurlaridan umidini uzgan aholi uylaridan quduq kavlab, “kacheli” o‘rnatib olgan. Suv havzasi ishlaganida mahalla aholisi to‘liq ichimlik suvi bilan ta’minlangan bo‘lar edi. Sababi, bu inshoot 9 ming aholiga suv berish quvvatiga ega.
Filial rahbari Adham Yusupov bu inshoot hali filialga topshirilmaganligini ta’kidlagan. Ammo viloyat “Suvoqova” boshqarmasi bosh hisobchisi Husniddin Saidakbarovning aytishicha, suv havzasi Shahrisabz tumani filiali asosiy vositalari ro‘yxatiga kiritilgan, ya’ni ularning balansida turibdi. Inshoot 2012-yilda viloyat “Suvoqova” boshqarmasi tomonidan qabul qilib olingan.
Izoh (0)