2018-yilning birinchi yarim yilligida fuqarolik ishlari bo‘yicha sudlar tomonidan 119 823 ta ish ko‘rib chiqildi va 168 milliard so‘mdan ziyod majburiy to‘lovlarni undirish haqida 165 864 ta sud buyrug‘i chiqarildi. Bu haqda O‘zbekiston Respublikasi Oliy sudi rasmiy vakili Aziz Obidov ma’lum qildi, deb yozadi “Gazeta.uz”.
Ko‘rib chiqilgan fuqarolik ishlari bo‘yicha 102 930 ta hal qiluv qarori chiqarildi. Ushbu qarorlar bo‘yicha talablarning 83 foizdan ortig‘i qanoatlantirildi.
Fuqarolik ishlari bo‘yicha sudlarda ko‘rilgan ishlarning asosiy qismini nikohdan ajratish, qarz va kredit shartnomalaridan kelib chiqadigan nizolar va alohida tartibda yuritilgan ishlar tashkil etdi.
42 532 ta fuqarolik ishi sayyor sud majlislarida ko‘rib chiqildi.
Fuqarolik ishlari bo‘yicha sudlar tomonidan aholi bilan 3 647 uchrashuv va ochiq muloqotlar o‘tkazildi.
Bundan tashqari, O‘zbekiston Respublikasi Oliy sudi Fuqarolik ishlari bo‘yicha sudlov hay’ati tomonidan nazorat tartibida o‘rganilgan 525 ta ish bo‘yicha protestlar qanoatlantirildi. Quyi sudlar tomonidan chiqarilgan 462 ta qaror bekor qilindi va 40 ta sud qarori o‘zgartirildi.
Izoh (0)