Toshkentda yana “uy daftarlari” joriy qilinmoqda

Toshkentda ko‘p xonadonli uylarda yashovchilar uchun avval bekor qilingan “uy daftarlari” yana joriy etiladi. Bu haqda Toshkent shahar Ichki ishlar bosh boshqarmasi xabar bermoqda.

IIBB Migratsiya va fuqarolikni rasmiylashtirish boshqarmasi tomonidan tavsiyaviy tartibda har bir xonadonga tegishli bo‘ladigan №4 va №5 formadagi ro‘yxat kartochkalari eski tizim bo‘yicha “uy daftarlari”ga almashtirilmoqda.

Mutaxassislar fikricha, ulardan ro‘yxatga kiritish (propiska) va ro‘yxatdan chiqarish bilan bog‘liq masalalarni yechishda hamda gaz, elektr, suv va issiqlik ta’minoti xizmatlariga, shuningdek, notariat organlariga hujjatlarni taqdim etishda foydalanish qulay bo‘ladi.

Uy daftariga xonadonda yashovchilar haqidagi barcha ma’lumotlar kiritiladi.

Toshkentliklar “uy daftari”ni kitob yoki gazeta mahsulotlari sotiladigan chakana savdo do‘konlaridan olishi mumkin.

U xonadon egasida saqlanadi, bu tavsiyadan foydalanish-foydalanmaslikni uning o‘zi hal qiladi.