Yaponiyada xususiy raketa parvozga ko‘tarilishi bilan portlab ketdi

Interstellar Technologies venchur kompaniyasiga tegishli xususiy raketani uchirish bo‘yicha ikkinchi urinish ham muvaffaqiyatsizlikka uchradi: raketa startdan hech qancha o‘tmay portlab ketdi, deya xabar bermoqda “RIA Novosti”.

Uzunligi 10 metr bo‘lgan MOMO raketasini uchirish venchur kompaniyaning Yaponiya davlat aerokosmik agentligi (JAXA) yordamisiz uchuvchi qurilmani kosmosga olib chiqish bo‘yicha ikkinchi urinish edi.

Birinchi urinish roppa-rosa 11 oy avval — 2017 yil 30 iyulida bo‘lgandi. O‘shanda bir bosqichli, uzunligi 10 metr, og‘irligi 1 tonna bo‘lgan MOMO-1 raketasi Xokkaydo orolidan uchirilgan, biroq 20 kilometr yuqoriga ko‘tarilgach, u bilan aloqa uzilib qolgan edi. Raketa Xokkaydodan 6,5 ming kilometr uzoqlikda, Tinch okeaniga qulagan edi.

Ikkinchi urinish ham omadsiz kechdi. Boshqaruv 600 metr masofadan turib amalga oshirilgani bois, baxtsiz hodisa oqibatida hech kim jabrlanmadi. Tomoshabinlar uchun mo‘ljallangan joy esa raketa start maydonidan 1,5 kilometr uzoqlikda edi.

Kompaniya muvaffaqiyatsizlik sabablarini aniqlash ustida ish boshlagan.