Andijonda sud-huquq tizimi rivojida jamoatchilikning o‘rni muhokama qilindi

Andijonda “Sud-huquq tizimini yangi bosqichga ko‘tarishda jamoatchilikning o‘rni va roli” mavzusida davra suhbati bo‘lib o‘tdi. Bu haqda O‘zA xabar bermoqda.

“Adolat” sotsial-demokratik partiyasi Andijon viloyati kengashi hamda Jinoyat ishlari bo‘yicha viloyat sudi hamkorligida o‘tkazilgan tadbirda xalq deputatlari viloyat, shahar Kengashlari deputatlari, O‘zbekiston sudyalar assotsiatsiyasi hududiy bo‘limi mas’ul xodimlari, sudyalar, partiya tuman va shahar kengashlari raislari, partiya faollari ishtirok etdi.

Davra suhbatida mamlakatda huquqiy-demokratik davlat va fuqarolik jamiyati barpo etish, sud-huquq tizimini isloh qilish, mazkur jarayonda jamoatchilik ishtirokini kuchaytirish, fuqarolarning huquqiy bilimini yuksaltirish masalalari xususida fikr almashildi.

Tadbirda mavzu doirasida ma’ruzalar tinglandi, mutaxassislar tomonidan bu borada viloyatda olib borilayotgan ishlar haqida ma’lumot berildi, partiyaning shu yo‘nalishdagi ishlarini yanada kuchaytirish yuzasidan taklif va mulohazalar bildirildi.

Ishtirokchilar mavzu bo‘yicha o‘zlarini qiziqtirgan savollarga mutaxassislardan batafsil javob oldi.