Novosibirskda o‘zbekistonlik yalang‘och holda odamlarni garovga olib, konsul bilan uchrashuvni talab qildi

Rossiyaning Novosibirsk shahrida O‘zbekiston fuqarosi ishtirokida ko‘ngilsiz voqea ro‘y berdi. Bu haqda Sputnik xabar qildi.

Novosibirskning Zayelsovsk tumani prokurori yordamchisi Artyom Xomenkoga ko‘ra, yalang‘och erkak bir kvartiraga bostirib kirib, u yerdagi odamlarni garovga olgan, so‘ng konsul va prokuror bilan uchrashuv tashkil etilishini talab qilgan.

Muhojirning aytishicha, u Rossiyaga Toshkentdan kelgan, qurilishda ishlagan, ammo, obyekt egalari bilan janjallashib, ko‘chada qolib ketgan. Shundan so‘ng erkak joniga qasd qilish qaroriga kelgan.

U ko‘p qavatli uy tomiga chiqib, yechingan, ammo shu payt joniga qasd qilish fikridan qaytgan. Buning o‘rniga u bir kvartiraga bostirib kirib, u yerda yashovchi ona va o‘g‘ilni garovga olgan.

U shu yo‘l bilan deportatsiyaga erishmoqchi edi. Ammo u qo‘lga olindi va endilikda javobgarlikka tortiladi.