WSB boks musobaqasining Toshkentda kechgan ketma-ket ikki turini g‘alaba bilan yakunlagan Uzbek Tigers 23-mart kuni Kolumbiya ringlarida ko‘rinish beradi.
O‘zbekistonlik charm qo‘lqop ustalari WSB’ning 2018-yilgi mavsumini Kubada boshlab, Cuba Domadores klubidan 0:5 hisobida yengilgandi. Keyin esa kubaliklar Toshkentda mag‘lub etildi — 4:1.
3-turda Kolumbiyaning Colombia Heroicos jamoasi ham 4:1 hisobida taslim qilingandi. Endi C2 bokschilar, ya’ni, Toshkentda ringga chiqmagan qolgan 5 ta vazn toifasi vakillar Kolumbiyada jang qiladi.
Turnir jadvalida Kuba va O‘zbekiston jamoalari 6 tadan ochko bilan peshqadam bo‘lib turibdi. Venesuela hamda Kolumbiya jamoalari keyingi o‘rindan joy olgan. WSB doirasida o‘zbekistonliklar hozircha jami 15 ta jang o‘tkazgan bo‘lib, shularning 8 tasida zafar quchgan va 7 tasida imkoniyat boy berilgan. Kubada esa 11 ta g‘alaba va 4 ta mag‘lubiyat.
Izoh (0)