“Xalq so‘zi” gazetasida ijtimoiy tarmoqlarda Dima Qayum taxallusi bilan tanilgan hunarmand-tadbirkor Dilshod Boltaboyev o‘z mablag‘i hisobidan Farg‘ona viloyati Rishton tumanidagi bozorda barpo etgan kutubxonasi tuman hokimligi tomonidan buzilishi rejalashtirilayotgani haqidagi maqola chop etildi. Quyida maqola to‘liqligicha e’tiboringizga havola etiladi.
O‘zbekistonda kitob mahsulotlarini chop etish va tarqatish tizimini rivojlantirish, kitob mutolaasi va kitobxonlik madaniyatini oshirish hamda targ‘ibot qilishga har doimgidan ham ko‘proq e’tibor qaratilayapti.
Xalq, xususan, yosh avlod qalbiga ma’rifat nurlarini olib kirish, tafakkurini boyitishdek ezgu ishlarga bosh qo‘shayotganlar ichida tadbirkorlar safi kengayib borayotgani quvonarli hol. Endi odamlar ko‘z o‘ngida ishbilarmon deganda faqat pulning ketidan quvib, daromad qidirib yuradigan inson emas, balki jamiyatda ma’naviyatni yuksaltirishga o‘zining beminnat hissasini qo‘shishga intilayotgan ijtimoiy faol shaxs gavdalanyapti. Bunday yaxshi tashabbuslar nafaqat markaziy shaharlarda, balki chekka tumanlarda ham qanot yoyayotganligi esa ahamiyatli voqeadir. Ulardan biri rishtonlik hunarmand-tadbirkor Ijtimoiy tarmoqlarda Dima Qayum taxallusi bilan tanilgan Dilshod Boltaboyevdir.
U xayriya mablag‘lari va o‘z hisobidan bozordagi o‘ziga ajratilgan joydan kutubxona ochdi, odamlarga beminnat ziyo taratishga kirishdi. Biroq shu kunlarda bunday olijanob harakatni to‘xtatishga bo‘layotgan urinishlar nafaqat bozordagilarni ajablantirmoqda, balki ma’rifatni sevuvchi barchaning e’tiroziga sabab bo‘lmoqda. Buni u “Facebook” ijtimoiy tarmog‘ida yozib qoldirgan murojaatini o‘qib bildirilayotgan yurtdoshlarimiz fikrlaridan ham anglash qiyin emas. “Ota-onam nafaqadalar. Men esa Rishton tumani dehqon bozorida tunuka va pechka mahsulotlari savdosi bilan shug‘ullanaman” , — deb yozadi u.
Davlat rahbarining kitob mutolaasi va kitobxonlik madaniyatini oshirish hamda targ‘ibot qilish maqsadida amalga oshirayotgan tashabbuslaridan ilhomlanib bozordagi qonuniy joyiga o‘tgan yil sentabr oyidan o‘z kutubxonasidan kitoblar olib chiqqani haqida to‘xtalib o‘tadi.
“Internetdagi do‘stlarimga ham iltimos qildim. Kitoblar yog‘ilib kela boshlagandan keyin, Xalq ta’limi vazirligi mutasaddisi va Rishton tuman hokimi bilan suhbatlashib, ruxsat oldim. Shundan so‘ng o‘zimning do‘konimdan 12 kv.m. joyga akfadan qurilish ishlarini boshlab, 25 kunda zamonaviy “Roshidoniy” xalq kutubxonasini bitkazdim. Ochganimga uch oy bo‘lgan bo‘lsa, kitoblar soni 1500 donadan oshdi. Kitob o‘quvchilari soni 1000 dan ko‘paydi. Bu qurilishga barcha yurtdoshlarim xayriya aksiyasi qilib, pul berishdi. Men esa hamma mablag‘ni shu kutubxonaga sarf qildim” — deydi tadbirkor.
Ammo u Rishton tumani hokimidan buyruq olgan arxitektura-qurilish bo‘limi boshlig‘i kecha tongda tuman IIB va yong‘in xavfsizligi bo‘limi vakillari bilan chiqib, uni “Sen noqonuniy qurding” deya adolatsiz ayblagani haqida kuyinib gapiradi.
Hokim yoniga kirib, bu ishlar uchun 30 million so‘mdan oshiq pul sarflaganini aytganda, tuman rahbari “boshqa yerdan joy olib beraman, kredit ham beraman”, deb javob qaytargan.
Ammo Dilshod Boltaboyev esa boshqa joyga bora olmasligi, berilgan kreditni to‘lay olmasligi, sababi garovga qo‘yishga hech nimasi yo‘qligini bayon etgan.
“Har kuni o‘quvchilar 20—25 donadan kitob olib ketishmoqda. Albatta, bepul tarqatyapman. Yonida do‘konchamda savdo qilayapman” deb yozar ekan shunday iltimos qiladi: “O‘quvchilar va o‘z nomimdan o‘tinib so‘rayman, shu joyimni buzishmasin. Hech qanday yong‘inga va hokazolarga xalaqit qilmaydi”.
Prezidentning “Jaholatni ma’rifat bilan yengamiz” degan so‘zlari qulog‘ida doimo jaranglashi haqida so‘zlar ekan, yana takrorlaydi: “Iltimos, o‘tinib so‘rayman, kutubxonani buzishmasin. Yordam bering. Qishloqda kutubxona bor. Lekin sharoiti yo‘q. Ham uzoq. Hech kim bormaydi. Men qurgan bepul kutubxona bozorga yumush bilan kelgan odam olib ketyapti. Albatta, bepul”.
Qayd etilishicha, ayni paytda gazeta muxbiri mazkur murojaatning taqdiri bilan qiziqib, hunarmand va mahalliy hokimlik mutasaddilari bilan uchrashmoqda.
Izoh (0)