Bugun, 8-fevral kuni Alisher Navoiy nomidagi Toshkent davlat o‘zbek tili va adabiyoti universitetida “Alisher Navoiy va XXI asr” mavzusida respublika ilmiy-amaliy anjumani bo‘lib o‘tmoqda. Bu haqda “Daryo” muxbiri xabar bermoqda.
Universitetda tashkil etilgan mazkur anjumanda 15 dan ortiq xorijiy mamlakatlarning O‘zbekistondagi favqulodda va muxtor elchilari, xususan, AQShning O‘zbekistondagi favqulodda va muxtor elchisi Pamela Leora Spratlen, Fransiya elchisi Vilon de Vilmor, Bangladesh elchisi Mosud Mannan, Eron elchisi Bahman Ogorazi Durmanilar ishtirok etdi.
Bundan tashqari, anjumanda milliy-madaniy markazlar rahbarlari, tilshunos va adabiyotshunos olimlar, keng jamoatchilik vakillari ham qatnashdi. Anjuman Alisher Navoiy haykali poyiga gul qo‘yish marosimi bilan boshlandi.
Universitet rektori, filologiya fanlari doktori, professor Shuhrat Sirojiddinov yig‘ilganlarni buyuk alloma tavalludining 577 yilligi bilan qutladi. Oliy va o‘rta maxsus ta’lim vaziri Inomjon Majidov, O‘zbekiston Respublikasi Vazirlar Mahkamasi huzuridagi Millatlararo munosabatlar va xorijiy mamlakatlar bilan do‘stlik aloqalari qo‘mitasi raisi o‘rinbosari Kamoliddin Eshonxo‘jayev, YuNESKOning O‘zbekistondagi vakolatxonasi rahbari Dendev Badarch, O‘zbekiston Yozuvchilar uyushmasi raisi Muhammad Ali so‘zga chiqib, Navoiy ijodini o‘rganishga bo‘lgan qiziqish yanada oshib borayotganini, uning asarlari olamshumul ahamiyatga egaligini va butun dunyo Navoiy shaxsiga hurmat bajo etishining boisi u ilgari surgan g‘oyalar hech qachon eskirmasligida ekanligini e’tirof etdi.
Anjumanda san’atkorlar tomonidan mumtoz musiqa va qo‘shiqlar ham ijro etildi.
Anjuman 6 ta sho‘bada o‘z ishini davom ettirmoqda.
Izoh (0)