O‘zbekistonda restoranlarga kuniga 24 soat ishlashga ruxsat berilishi mumkin

O‘zbekistonda restoranlar va boshqa turdagi jamoat tanovul muassasalari tourist-friendly sertifikatiga ega bo‘lib, kuniga 24 soat ishlash huquqiga ega bo‘ladi. Bu haqda 15-yanvar kuni o‘tgan matbuot anjumanida Turizmni rivojlantirish davlat qo‘mitasi raisi Aziz Abduhakimov ma’lum qildi, deb xabar beradi “Gazeta.uz”.

Uchrashuv chog‘ida restoran va qahvaxonalar kechki soat 23:00 da yopilishi, bu borada muassasalar egalari va turistlardan e’tirozlar kelib tushayotgani ta’kidlandi.

“Biz kun bo‘yi ishlashni xohlaydigan qahvaxona va restoranlar turistlarning xavfsizligini ta’minlab berishini, shuningdek, tourist-friendly tizimi talablariga javob bera olishini taklif qildik. Qo‘mita tomonidan Vazirlar Mahkamasining tegishli qarori loyihasi ishlab chiqildi. Yaqin vaqt ichida 24 soat ishlaydigan jamoat tanovul muassasalari paydo bo‘ladi deb o‘ylaman”, — dedi u.

Tourist-friendly tizimi joylashish vositalari, ovqatlanish punktlari, galereya, muzeylar, transport tashkilotlari va turizm infrastrukturasining boshqa obyektlari erkin sertifikatsiyasini nazarda tutadi. Uch yil muddatga beriladigan sertifikat sanitariya me’yorlariga rioya etilishini, mahsulot sifati va assortimenti yaxshligini tasdiqlaydi.

Bunday sertifikat egalari maxsus sifat belgisi topshiriladi. U ingliz tilida tuzilib, turistlar xizmatlarni tanlashida yengillik yaratib beradi.