H&M “changalzordagi eng ajoyib maymuncha” tufayli irqchilikda ayblandi

Shvetsiya reteyleri H&M (Hennes & Mauritz) bolalar kolleksiyasi reklamasidan so‘ng irqchilikda ayblandi. Reklamada “Changalzordagi eng ajoyib maymuncha” yozuvi tushirilgan kiyimni qora tanli bola taqdim etgan, deb yozadi CNBC.

Twitter foydalanuvchilari savdo markasini boykot qilishga chaqirdi, shuningdek, marketologlar bu reklamani o‘ylab chiqayotganda mast yoki psixofaol moddalar ta’sirida bo‘lganligini taxmin qildi.

Tanqiddan so‘ng H&M reklamani o‘chirdi. Kompaniya vakili reteyler tahqirlash uchun chin ko‘ngildan uzr so‘rashi va kelajakda bu kabi muammolar oldini olish uchun o‘z siyosati ustida ishlashini ma’lum qildi.

H&M saytdan model suratini olib tashladi, maymun haqidagi yozuv tushirilgan sviterni hamon sotib olish mumkin. Bolalar kolleksiyasida jirafa va yo‘lbars suratlari tushirilgan sviterlar ham bor, ularni oq tanli bolalar reklama qilgan.