Moskva sobiq meri Yuriy Lujkov o‘zining “Moskva va hayot” deb nomlanuvchi birinchi avtobiografik kitobida mer lavozimidan iste’foga chiqishi sababini aytib o‘tdi, deb yozadi “Vedomosti”.
“Haqiqiy sababi bitta edi — Dmitriy Medvedevni uning Rossiya prezidentligiga ikkinchi muddatga da’vogarlik qilishida qo‘llab-quvvatlashdan bosh tortishim”, — deb yozadi Lujkov.
Tavsiflab berilgan holat 2010-yilning apreliga tegishli. O‘shanda prezident bo‘lib ishlayotgan Dmitriy Medvedev “birinchi muddatdagi faoliyatining foydasiz natijalariga va faqat bir muddatgina prezident bo‘lishi haqidagi kelishuvlarga qaramay, prezident saylovlarida ikkinchi marta ham g‘olib chiqishga urinib ko‘rishga qaror qilgandi”, — deya qayd etadi sobiq mer.
Lujkovning versiyasiga ko‘ra, Medvedev o‘z orzularini hudud yetakchilari, avvalo Moskvaning qo‘llab-quvvatlashlari bilan mustahkamlashi kerak edi. Bu taklifni Lujkovga tadbirkor Boris Xait yetkazgan. Xait Lujkovning Medvedevni kelasi prezident saylovlarini qo‘llab-quvvatlashini kutishayotganini, aks holda, uning siyosiy karyerasi “nafaqat yakun topishi, balki sanksiyalar ham bo‘lishi”ni aytgan. Lujkov esa “uzil-kesil rad javobini bergan”. 2010-yil sentabrida Medvedev Lujkovni “ishonchni yo‘qotgani uchun” degan sabab bilan ishdan bo‘shatgan.
Izoh (0)