Janubiy Koreya Serbiya bilan, Qatar Islandiya bilan durang o‘ynadi. Yaponiya Belgiyadan yengildi

FIFA kunlaridan unumli foydalangan Osiyo mamlakatlari xalqaro o‘rtoqlik o‘yinlarida 14-noyabr kuni ham maydonga tushdi.

O‘tgan hafta o‘z maydonida Kolumbiyani taslim qilgan Janubiy Koreya, bu safar Serbiya bilan durang o‘ynadi — 1:1. JCh—2018 ishtirokchisi bo‘lgan serblar to‘rt kun oldin Xitoydan g‘alaba bilan qaytgandi — 2:0. Chin o‘lkasi vakillari esa bu safar aksincha, Kolumbiyani mehmon qildi va o‘z darvozasidan javobsiz 4 ta gol o‘tkazib yubordi.

Bahodir Nasimov: Koreyaning hatto quyi ligasi ham O‘zbekiston Oliy Ligasidan kuchli

Qatar termasi garchi mundialda ishtirok etmasligi aniq bo‘lsa-da, o‘rtoqlik o‘yinlariga jiddiy e’tibor bergan. To‘rt kun avval o‘zbekistonlik Sherzod Qosimov boshqargan uchrashuvda Qatar Chexiyadan yengilgandi — 0:1. Bu safar Dohaga tashrif buyurgan JCh—2018 ishtirokchisi Islandiya g‘alabani qo‘ldan chiqardi. Qayd etish kerak, islandiyalik futbolchilar Yevropa saralashida Ukraina, Xorvatiya, Turkiya kabi termalardan ustun bo‘la olgandi.

Ro‘ziqul Berdiyev boshqaruvida O‘zbekiston milliy termasi BAAga imkoniyatni boy berdi

Yaponiya esa 4 kun ichida ikki kuchli terma bilan kuch sinashdi. Avvaliga Braziliyadan 1:3 hisobida yengilgan kunchiqar yurt termasi, bu safar Belgiyaga imkoniyatni boy berdi — 0:1. O‘yindagi yagona gol “Manchester Yunayted” hujumchisi Romelu Lukaku tomonidan urildi. Belgiyaning o‘zi to‘rt kun oldin Meksika bilan jangovor durang o‘ynagandi — 3:3.

Osiyo yetakchilari FIFA kunlarida nomdor raqiblarga qarshi o‘ynamoqda. O‘zbekiston-chi?

Janubiy Koreya — Serbiya 1:1

Gollar: Adam Lyaich, 59 (0:1). Ku Ja Cheol, 62-pen (1:1).

Xitoy — Kolumbiya 0:4

Gollar: Felipe Pardo, 6 (0:1). Karlos Bakka, 62 (0:2). Migel Borxa, 67 (0:3). Migel Borxa, 92+ (0:4).

Qatar — Islandiya 1:1

Gollar: Vidar Kyartansson, 26 (0:1). Muhammad Muntari, 91+ (1:1).

Belgiya — Yaponiya 1:0

Gol: Romelu Lukaku, 72 (1:0).