Ukraina xavfsizlik xizmati 7-may kuni prezident Vladimir Zelenskiy va boshqa yuqori martabali amaldorlarga nisbatan suiqasd tayyorlagan ikki polkovnikni hibsga oldi. Bu haqda The Kyiv Independent nashri xabar berdi.
Manbada aytilishicha, xavfsizlik xizmati Ukraina rahbariyati vakillariga hujum uyushtirishni reja qilgan butun boshli tarmoqni fosh qilgan. Ushbu jinoiy tarmoq Rossiya Federal xavfsizlik xizmati tomonidan boshqarib kelingani xabar berilgan.
O‘tgan yilning noyabr oyi oxirida Vladimir Zelenskiy The Sun nashriga bergan intervyusida Rossiyaning keng ko‘lamli urushi boshlanganidan beri kamida beshta suiqasddan omon qolganini maʼlum qilgan edi. Rossiya suiqasdda Kiyev harbiy maʼmuriyati aʼzolaridan foydalanishga uringani aytilgan.
Manbada aytilishicha, hujum Rossiya Federal xavfsizlik xizmatiga ishlagan harbiylar — Maksim Mishustin, Dmitriy Perlin va Aleksey Kornevlar tomonidan tashkil etilishi kerak bo‘lgan.
“Bu suiqasd aslida Rossiya prezidenti Vladimir Putinga inauguratsiya marosimi uchun sovg‘a bo‘lishi kerak bo‘lgan. Ammo Rossiya maxfiy xizmati muvaffaqiyatsizlikka uchradi”, — deyiladi Ukraina xavfsizlik xizmati rahbari Vasil Malyuk hisobotida.
Rossiyaning suiqasd orqali o‘ldirishni rejalashtirgan shaxslar orasida, Vladimir Zelenskiydan tashqari Ukraina xavfsizlik xizmati Vasil Malyuk va Ukraina harbiy razvedkasi rahbari Kirill Budanov ham bo‘lgan.
Budanovga suiqasd 5-may kuni nishonlanadigan Pasxa bayrami oldidan amalga oshirilishi rejalashtirilgan bo‘lgan. Rossiya agenti Budanovning harakatlarini kuzatib borishi va maʼlumotlarni Rossiyaga yetkazishi kerak bo‘lgan. Manbada keltirilishicha, qo‘lga olingan polkovniklar suiqasdni sodir etishi belgilangan Rossiya agentlarini dronlar, o‘tochar qurollar va piyodalarga qarshi minalar bilan taʼminlab kelgan.
Rasmiylar tergov jarayoni davom etayotganini bildirgan. Prezident Zelenskiyning xavfsizligi yuksak darajada taʼminlangani aytilgan.
Izoh (0)