Muvaffaqiyatli inson bo‘lishingizga xalaqit beruvchi miflar

InsiderPro nashri karyera borasidagi eng mashhur yanglish fikrlarga nisbatan ekspertlar munosabatini keltiradi.

Bu miflar — jamiyat ta’siri natijasi. Ularni qachon va kimdan — bolalikda ota-onangizdan, maktabda sinfdoshlaringizdan, ishda hamkasblaringiz yoki barda do‘stlaringizdan eshitganligingiz muhim emas. Ular ongingizga muhrlanishga ulgurgan. Endi ulardan qutulish juda qiyin.

Ular muvaffaqiyatli bo‘lishingizga xalal beradimi? Katta ehtimol bilan ha. Aynan qaysi yolg‘on maslaklar bunga to‘sqinlik qilmoqda?

Eng yaxshi ekspertlar 10 ta eng mashhur mifni keltiradi.

1. Muvaffaqiyatli ko‘ringan odamlar muvaffaqiyat qozongan

Yirik shaharlarda kim muvaffaqiyatga erishgan, kim erishmaganligini tushunish qiyin. Cisco kompaniyasi buyumlar va raqamli xizmatlar bo‘limi vitse-prezidenti Jozef Bredli Mauntin-Vyuda o‘sdi. Biroq tadbirkorlik faoliyati boshlanishidan ancha avval u Wells Fargo’da operatsionist bo‘lib ishlagan.

Bredli mijozlar bank avtomobillar turargohiga o‘ta qimmat eksklyuziv mashinalarda kirib kelishini ko‘rgan va ularni badavlat deb o‘ylagan. Biroq ularning hisoblari bo‘yicha ma’lumotni ochganda, bir necha marta u yerda ayanchli 100 dollarni ko‘rgan. Aksincha zalga oddiy futbolka va djinsida kirgan yigit haqida ekran kutilmaganda VIP maqomni ko‘rsatgan.

Tez orada Bredli muvaffaqiyatli ko‘ringan odamlar aslida unday emasligi, chunki bor pulini boshqalarni aldashga sarflashini anglab yetdi.

2. Omadga erishish uchun dastlab muvaffaqiyatsizlikni boshdan kechirish kerak

Tadbirkorlarning aksariyati birinchi omadsiz loyihalar ularga tengsiz tajriba berganligini ta’kidlaydi. Kremniy vodiysida esa omadsiz odam tamg‘asi sharaf belgisiga aylangan. Qanchalik ko‘p narsaga erisha olmasangiz, shuncha ko‘p maqtashadi. Bu o‘ziga xos g‘olibi yo‘q musobaqadek.

Bredli bu borada shunday deydi: “Muvaffaqiyatsizliklarga muhabbat — bu bo‘lmag‘ur gap. Dastlab qora palladan o‘tishni istashini ta’kidlovchi istalgan odam nima deyotganini bilmaydi”.

“Oldinga intilish uchun ta’lim olish sur’atini tezlashtirish va qilayotgan ishingizda bilimlaringizni oshirishingiz kerak”, — deydi Bredli. O‘shanda muvaffaqiyat qozonasiz va keraksiz omadsizliklar oldini olasiz.

3. Hamma narsani bilish kerak

Hamkasblaringiz orasida hamma narsani bilishni istaydigan bilag‘onlar uchrab tursa kerak. Yoki ovqatlana turib ham kitob o‘qiydigan tadbirkorlar. Albatta, mustaqil o‘qishning hech qanday yomon tomoni yo‘q. Biroq bunday odamlar uchun o‘qish asosiysi emas. Ular o‘z sohasi, raqobatchilari va istiqbolli mijozlarini atroflicha o‘rganish uchun barcha kuchini sarflaydi.

To‘g‘ri, ma’lumot — bu kuch, biroq siz hamma narsani bilishingiz shart emas.

Muammo mavhumlikda emas. Ertaga nima bo‘lishini hech kim bilmaydi. Haqiqat deb hisoblagan narsalaringizga tanqidiy munosabatda bo‘lsa olsangiz, oxir-oqibatda muvaffaqiyatga erishasiz.

4. Hamma ishni bajara olish lozim

Ba’zi odamlar biznesni boshlay turib, hamma sohada eng yaxshisi bo‘lish kerak degan fikrda bo‘ladi. Biroq hamma narsaning ortidan quvadigan odam odatda yuzaki bilimlar bilan cheklanadi va hech bir ko‘nikmani puxta egallamaydi.

“Hamma narsani bilish shart emas, — deydi Paragon BioTeck, Inc. prezidenti va bosh direktori Patrik Uitem. — Hayot menga bergan eng muhim dars shuki, bir narsani yaxshi va chuqur tushunish hamda doim shu yo‘nalishda ishlash lozimligidir. Ha, bu ko‘p narsa emas, lekin bunday yondashuv ancha samaraliroq”.

Hamma narsani bilishga urinmasdan, o‘z sohangiz va haqiqatda kuchli tomonlaringizga e’tibor qarating.

5. Hammasini mustaqil bajarish mumkin

Hamma ish joyida ekanligida, o‘ziga bo‘lgan ishonch paydo bo‘ladi. Bu yuz berganda ko‘pchilik atrofdagilar fikriga suyanmay qo‘yadi va hammasini o‘z qo‘liga oladi.

Omad uchun jamoa va narsalarga turli tomondan qarash talab etiladi.

“Kompaniyamiz yangi dori vositalari va texnologiyalar uchun litsenziya olishda yuzaga keladigan muammolarni hal qiladi. Bu mijozlarga byurokratik to‘siqlarni tezroq yengish imkonini beradi, — deydi Uitem. — Juda ko‘p narsa atrofdagilar bilan o‘zaro munosabatlarga bog‘liq. Boshqa sohalarda kuchli hamkorlarimiz bor, ular yordamida mijozlarimiz muammolarini hal qilamiz. O‘z aloqalaringiz va tajribangizdan foydalaning. Hamma tomon uchun manfaatli bo‘lgan munosabatlarni yarating va rivojlantiring”.

6. Ishda eng muhimi — ko‘nikmalarni charxlash

Ko‘nikmalar bu asosiysi emas. “Asosiysi — jamoadagi madaniyat, — deydi Duglas Endryu, bestsellerlar seriyasi muallifi va Live Abundant konsalting kompaniyasi asoschisi. — Mehnat munosabatlariga uch oyoqli stuldek qarashni tavsiya qilaman”.

Endryu so‘zlariga ko‘ra, rahbar sifatida siz:

•  Barcha xodimlaringizni hurmat qilishingiz kerak. Ularga kibr bilan qaramang va maqomingizga urg‘u bermang. Ularga e’tibor qarating — ular samimiy qiziqishingizni his qilsin.
•  Hamfikrlikni o‘rnating. Xodimlaringizni yaqindan biling. Ularning turmush o‘rtog‘i va rafiqalari ismlarini bilib oling. Ularning muammolariga qiziqing. Ularning hayotida ishtirok eting, savollar, masalahatlar bering, ehtiyojlarini hisobga oling.
•  Bardoshlilikni rivojlantirish. Noxushliklardan so‘ng qayta tiklanish qobiliyatidan muhimroq ko‘nikma yo‘q.

7. Asosiysi — imtiyoz va bonuslar

“Odamlarga ko‘proq narsa taklif qiling. O‘z ustida ishlashi mumkin va bir-biriga g‘amxo‘rlik qila oladigan ish sharoitlarini taklif qiling, — deydi Endryu. — Kompaniyamizda xodimlar haftada bir marta jamoaning boshqa a’zolari bilan uchta yutug‘ini bo‘lishadi: odatda bu ularning shaxsiy hayotiga taalluqli. Biz oddiy ishchi jamoa emasmiz — biz oilamiz. Yiliga 14 kunni munosabatlarimizni mustahkamlashga ajratamiz — tadbirlarning ko‘p qismi ofisdan uzoqda, tabiat yoki ijara binolarida o‘tadi. Yiliga to‘rt marta banketlarda xodimlar turmush o‘rtoqlari ham taklif etiladi, ulardan ikkitasiga farzandlari ham. Aynan shu jamoada do‘stona va iliq munosabatlarni o‘rnatadi”.

8. Xodimlar va mijozlar fikrlarini nazorat qilish imkonsiz

Kompaniyani boshqarar ekansiz, xodimlar va mijozlar fikrlarini nazorat qilish mumkinligini tasavvur qilish qiyin.

Endryuga yangi odamlar kelganda u ulardan nima bilan shug‘ullanishini so‘raydi. Ko‘pincha ular: “men oddiy kotibaman, telefon qo‘ng‘iroqlariga javob beraman”, kabi javob beradi.

“Bunday vaziyatda biz xodimlarimizga ‘Buxgalteriya hisobi bilan shug‘ullanaman’ deyish o‘rniga ‘Oilalar, jamiyat va butun dunyoni o‘zgartiruvchi kompaniyani qurishga yordam beraman’ deyishga o‘rgatamiz. Ko‘pchilik xodimlar o‘z ishidan uyaladi va u haqda gapirishni istamaydi. Yaxshi rahbarning vazifasi bunday munosabatni o‘zgartirish”.

9. Xatolarni tan olish mumkin emas

“Xatolarni tan olish nafaqat mumkin, balki zarur ham — qiyinchiliklar bilan kurashayotganingizni boshqalar ko‘rsin. — deydi Kaliforniya universiteti prorektori Maykl Dennin. — Yetakchilar o‘z xatolari uchun javob berishi lozim”.

Mas’uliyatni zimmangizga olsangiz atrofdagilar sizga ishonish mumkinligini anglaydi.

10. Yetakchilikni o‘rganib bo‘lmaydi

Yetakchi bo‘lish mumkin emas, rahbar bo‘lib tug‘ilish kerak degan fikrdamisiz? Ehtimol aynan shunday fikrlaringiz tufayli zerikarli ofis ishida qotib qolgandirsiz.

Yechim bor — yetakchilik ko‘nikmalarini o‘zlashtirish kerak.

“Yuqoriga chiqish imkoniyati yuzaga kelishini kutmang. Maxsus kurslarga boring, vaqtingiz bo‘lmasa boshqa resurs toping”, — deydi Dennin.

O‘z kuchingizga ishoning va kech bo‘lmasdan, orzuingizdagi karyerani barpo eting.