Diyego Kostani 3 yil avval “Chelsi”ga 38 millionga sotgan “Atletiko”, endi 60 millionga uni qaytarib oldi

Madridning “Atletiko” klubi hujumchi Diyego Kostaning qaytayotganini rasman e’lon qildi. Bu borada jamoa London “Chelsi”si bilan kelishuvga erishgan.

Yaqin kunlar ichida Diyego Kosta “Atletiko” tibbiy ko‘rigidan o‘tadi. Bungacha u “Chelsi” bosh murabbiyi Antonio Konte bilan chiqisha olmay qolgan, yakunda italiyalik mutaxassis Kostaga jamoaga ortiq kerak emasligi borasida xabarnoma qoldirgandi.

Bundan tashqari londonliklar hujum chizig‘ini kuchaytirish uchun “Real”dan Alvaro Moratani sotib oldi. 80 million yevroga tushgan futbolchi “Chelsi”ga moslashib ketdi va qator gollar ura boshladi.

“Chelsi” Diyego Kostani uch yil avval 38 million yevroga sotib olgandi. “Atletiko” endi uni 60 million berib qaytarib olmoqda.