“Istiqlol” san’at saroyining direktori Isroil G‘ulomov jurnalist Feruz Muhammadga intervyu berdi. Isroil G‘ulomov suhbat davomida ko‘chadagi noqonuniy bilet sotishlar haqidagi savollarga ochiq-oydin javob berdi.
—Balki bu sizning vakolatingizga kirar, balki kirmas, ammo o‘zini sahnada yoki sahna ortida madaniyatli tutmagan xonandaga dakki bergan holatlaringiz bo‘lganmi?
—Bo‘lgan albatta, misol uchun Jasur Umirov so‘nggi konsert dasturida, sahnada sal noto‘g‘riroq harakat qilganida unga aybini aytib, to‘g‘irlashi kerakligini bildirganman. Shundan keyin, Jasur konsertining boshqa kunlarida o‘sha odatini takrorlamadi. Botir Qodirovda ham shunga o‘xshagan voqea bo‘ldi, u bilan fikrlashganimdan keyin hammasi joyiga tushdi. Sahnada xohlagan erkalikni qilish kerakmasda.
—Ayol xonandalarda ham shu kabi holatlar bo‘lganmi?
—Yo‘q, ayol xonandalar o‘ta tartibli.
—Uzoq yillardan buyon yechimini topmagan va hech kim uning borligini inkor etmaydigan muammo bor. “Ochiq osmon ostidagi chiptaxona”da chiptalar istalgan narxda sotiladi. Ammo ularga qarshi hech kim amaliy chora ko‘rmaydi, nega?
—Bu narsaga biz javob bermaymiz. Men o‘z hududimda bo‘ladigan voqealarga mas’ulman. Zinadan tushdingizmi siz menga qarashli hududdan chiqqan hisoblanasiz, zinadan bitta ko‘tarildingizmi aynan o‘sha joydan mening vakolatim doirasidagi hudud boshlanadi. Ularga qarshi ichki ishlar, department, soliq xodimlari, uchaska nozirlari kurashishi kerak.
—Ular bilan hech kim kurashmayaptiku, ko‘chada bo‘layotgan savdo-sotiq qaytanga siz uchun zarar olib kelmaydimi ?
—O‘sha qo‘lda chipta sotib yurganlar chiptaxonada chipta qolmagan taqdirdagina sotishadi, ular ham chiptani saroy chiptaxonasidan oladi baribir.
—Ammo shu ishni kasb qilib olganlar ham borku, har doim konsertga kelganimizda xuddi o‘sha odamlar savdo qilib yurgan, bizning yonimizga kelib “bilet olasizmi” deya so‘roqlayotgan bo‘ladi?
—Shunday tomoshabinlar borki, ularni “otib tashlayman”, desangiz ham o‘sha ko‘chadagi chayqovchidan chipta olsa oladiki, chiptaxonadan olmaydi. Shu kabi insonlar “ko‘cha kassirlari”ning doimiy xaridori bo‘lib qolgan. Buning ustiga ko‘p tomoshabinlar o‘sha ko‘chada savdo qilayotganlar bilan oldindan telefonda gaplashib, chipta buyurtma qilib qo‘yadigan holatlar ham uchraydi. Ular bilan qanday kurashib bo‘ladi?! Buning yana bir uchi konsert tashkilotchisiga borib taqaladi, agar ular o‘sha chiptalarni tartib bilan sotishsa, bunday holatlar yuzaga kelmagan bo‘lardi. Bir xil tashkilotchilar yaxshi joylarni keyinroq, oxirida sotaman deb yashirib turishadi, bunday bo‘lganidan so‘ng tomoshabin o‘z-o‘zidan yo‘qolib qoladi va ko‘chaga murojaat qilishga majbur bo‘ladi.
—Har bir tomoshabin xohlagan miqdorda, istganicha chipta sotib olishi mumkinmi?
—Mumkin
—100 ta yoki 1000 ta ham olishi mumkinmi?
—Albatta mumkin.
—Qaysidir konsert dasturlarining chiptalari “har bitta tomoshabinga bittadan, shaxsni tasdiqlaydigan hujjatni ko‘rsatganidan so‘ng sotilgan” degan gaplarni ham eshitganmiz?
—Bu bo‘lmagan, uydirma gaplar.
—Ozodbek Nazarbekovning hamda Yulduz Usmonovaning konsert chiptalariga talab ko‘p bo‘lgani uchun xuddi shunday usul qo‘llanilgani haqida gaplar tarqalgandi?
—Mabodo chipta sotadigan konsert tashkilotchisining oldiga bitta odam uch va undan ortiq marotaba kelib, chipta olib ketgan bo‘lishi va uni tashkilotchi tanib qolib, shaxsini tasdiqlovchi hujjat bilan keling degan bo‘lishi mumkin.
—Cheklanmagan miqdorda chipta olishi mumkin deyapsiz-ku, bunday qilishga tashkilotchining haqqi bormi?
—Bor, chunki chiptani barcha tomoshabinlarga yetkazish kerak, axir. Unda ham har bitta tomoshabinga emas, o‘sha o‘ziga shubhali ko‘ringan yoki olibsotarlik bilan shug‘ullanayotganini bilgan ayrim insonlardan shaxsini tasdiqlovchi hujjat so‘rashi mumkin. Barcha tomoshabinlarga bunday talab qo‘yishga albatta ularning haqqi yo‘q.
Izoh (0)