Ostonada xalqaro avtomobillar tashuvlari doirasida O‘zbekiston hamda Qozog‘istonning hukumatlararo hamkorlikdagi yig‘ilishi bo‘lib o‘tdi. Bu haqda Qozog‘iston Respublikasining Investitsiya va taraqqiyot vazirligi matbuot xizmatiga tayanib, “Novosti Uzbekistana” xabar berdi.
“Shuningdek, tomonlar Qozog‘iston hamda O‘zbekiston o‘rtasida muntazam ravishda avtobus qatnovlarini ochish masalasini muhokama qildi va muntazam avtobus qatnovini dastlabki bosqichda Chimkent—Toshkent yo‘nalishi bo‘yicha ochishga kelishib oldi”, — deyiladi xabarda.
Bundan tashqari davlatlar dastlabki kvotalar yuzasidan ham kelishuvlarni amalga oshirdi.
“Muzokaralar davomida dastlabki kvotalar 2018-yil uchun uchinchi mamlakatlarga 1200 ruxsatnoma etib belgilandi. Shu bilan birga tomonlar 2017-yilning III choragi uchun uchinchi davlatlar bilan ruxsatnomalarini almashish masalalarini ko‘rib chiqish bo‘yicha kelishuvga erishdi”.
Investitsiya va taraqqiyot vazirligi ma’lumotlariga ko‘ra, 2017-yilning birinchi yarim yilligida Qozog‘iston hamda O‘zbekiston o‘rtasida avtomobil transportlari tomonidan olib o‘tiladigan yuklar hajmi 11 foizga ortib, 169,5 mingni tashkil etdi. Bunda yuklarning asosiy qismini, gilamlar, matolar, mevalar, sabzavotlar, plastmassa buyumlari, mexanizm va qurilmalar tashkil etgan.
Izoh (0)