Toshkent viloyati prokuraturasi o‘z saytini ishga tushirdi

Toshkent viloyati prokuraturasining rasmiy veb-sayti — tvp.uz ishga tushirildi. Bu haqda “O‘zbekiston 24” xabar bermoqda.

“Mazkur saytni yaratishga sabab bo‘lgan asosiy omil – bu aholini jamiyatda qonuniylik va huquq-tartibotni ta’minlash sohasidagi ma’lumotlar bilan tezkor xabardor qilish va qonunchilikda belgilangan vazifalarni amalga oshirish borasida jamoatchilikning fikrini o‘rganish va inobatga olish jarayonini nazarda tutuvchi xalq bilan samarali muloqotni yo‘lga qo‘yish ehtiyojining mavjudligidir”, — deyiladi prokuratura saytidagi yangilikda.

Hozirgi vaqtda saytdan foydalanish jarayonida quyidagi imkoniyatlar mavjud:

• Toshkent viloyat prokuraturasiga ariza, shikoyat va takliflarni virtual qabulxona orqali onlayn tarzda yo‘llash;
• huquqiy maslahat olish;
• viloyat prokuraturasi organlari faoliyati va uning amaldagi natijalari haqidagi ma’lumotlar, shuningdek, jamiyatda qonuniylik va huquq-tartibotni ta’minlash sohasidagi tadbir va yangiliklardan xabardor bo‘lish;
• ijtimoiy so‘rovlarda qatnashib, mintaqadagi korrupsiya holati va davlat organlari faoliyati samaradorligini baholash;
• qonunlar va huquqni qo‘llash amaliyotini takomillashtirish, shu jumladan, mavjud muammolarni bartaraf etishga qaratilgan takliflarni yo‘llash;
• viloyatdagi idora va tashkilotlarda mavjud bo‘lgan bo‘sh ish o‘rinlari hamda investitsion imkoniyatlar, shuningdek, bedarak yo‘qolganlar va jinoyat sodir etganlikda ayblanuvchi shaxslar qidiruvi bilan bog‘liq dolzarb ma’lumotlarga ega bo‘lish;
• jinoyatlar va baxtsiz hodisalarning oldini olish, shuningdek, turli hayotiy vaziyatlarda harakatlanish choralari va qoidalarini o‘zida ifoda etgan maxsus eslatmalar bilan tanishish.