Shavkat Mirziyoyev Yuqori Chirchiqda qurilayotgan logistika markazida bo‘ldi

O‘zbekiston Prezidenti Shavkat Mirziyoyev Toshkent viloyatining Yuqori Chirchiq tumanida barpo etilayotgan zamonaviy logistika markazida bo‘ldi. Bu haqda O‘zA xabar bermoqda.

Greenfoodtrade kompaniyasi tomonidan tashkil etilayotgan mazkur markaz qishloq xo‘jaligi mahsulotlarini saqlash, qayta ishlash va eksport qilish bilan shug‘ullanadi.

2018-yilning uchinchi choragida to‘la quvvat bilan ishga tushirilishi mo‘ljallanayotgan ushbu loyiha O‘zbekiston eksport salohiyatini oshirish, ichki bozorni qishloq xo‘jaligi mahsulotlari bilan uzluksiz ta’minlash, yer maydonlaridan unumli foydalanish, yangi ish o‘rinlari yaratish imkonini beradi.

40 gektardan ortiq maydonni egallagan majmuada 5 kross-doking, gipermarket, qishloq xo‘jaligi mahsulotlarini saralash va saqlash ombori, 10 ming tonnalik muzlatgich, 150 o‘rinli mehmonxona quriladi.

Shavkat Mirziyoyevga mazkur majmua haqida batafsil ma’lumot berildi.