Toshkent aeroportining yangi — “Toshkent-4” xalqaro terminali qurilishi vaqtincha to‘xtatildi. Bu haqda O‘zbekiston Prezidenti tomonidan 30-iyun kuni imzolangan qarorda ko‘rsatib o‘tilgan.
Qarorda qayd etilishicha, yangi terminal qurilishi turar va noturar joy binolarini buzish, Qorasuv kanalining ma’lum bir qismini hamda aholini ko‘chirishni talab qiladi. “Mazkur omillar qurilish ishlari olib boriladigan hududdagi aholi e’tirozlariga sabab bo‘lishi mumkin”, — deyiladi Prezident qarorida.
Shu munosabat bilan, “Toshkent-4” xalqaro terminalini qurish bo‘yicha loyihani vaqtincha to‘xtatib turish to‘g‘risida qaror qabul qilingan.
Eslatib o‘tamiz, poytaxt aeroportining yangi “Toshkent-4” xalqaro yo‘lovchi terminali 2019-yil oxirigacha qurib bitkazilishi kerak edi. Janubiy Koreya hukumati ko‘magida amalga oshirilishi ko‘zda tutilgan loyihaning qiymati 430 million dollardan ziyod edi.
Izoh (0)