20-iyun kuni Shavkat Mirziyoyev “O‘zbekiston Respublikasi Vazirlar Mahkamasi huzuridagi O‘zbekistonga oid xorijdagi madaniy boyliklarni tadqiq etish markazini tashkil etish to‘g‘risida”gi qarorni imzoladi. Qaror matni O‘zAda keltirildi.
Hujjatga ko‘ra, Madaniyat vazirligi, Tashqi ishlar vazirligi, Fanlar akademiyasi, “O‘zarxiv” agentligining Vazirlar Mahkamasi huzurida O‘zbekistonga oid xorijdagi madaniy boyliklarni tadqiq etish markazini tashkil etish to‘g‘risidagi taklifi ma’qullandi.
Markazning asosiy vazifalari etib quyidagilar belgilandi:
milliy va xorijiy mutaxassislarni jalb etgan holda, chet ellarda saqlanayotgan, mamlakat tarixi va madaniyatiga oid madaniy boyliklarni aniqlash, ularning to‘liq ma’lumotlar bazasi – reyestrini yaratish va uni muntazam yangilab borish, shuningdek, ana shu tarixiy eksponatlarning asl yoki ko‘chirma nusxalarini, foto va videotasvirlarini O‘zbekistonga olib kelish, tegishli ilmiy markazlar, xususan, Abu Rayhon Beruniy nomidagi Sharqshunoslik instituti bilan birgalikda ilmiy tadqiqotlar olib borib, erishilgan natijalarni ilmiy muomalaga kiritish borasidagi ishlarni muvofiqlashtirish;
faoliyat yo‘nalishi bo‘yicha xorijiy davlatlardagi muzey va fondlar, arxivlar, ilmiy-madaniy muassasalar bilan o‘zaro madaniy aloqalarni yo‘lga qo‘yish, turli anjumanlar, konferensiya va ko‘rgazmalar tashkil etish;
chet mamlakatlarda saqlanayotgan madaniy boyliklarni mamlakatga qaytarish yuzasidan muzokaralar olib borish va zarur chora-tadbirlar ko‘rish, bu borada xalqaro miqyosdagi ilg‘or tajribani o‘rganish va amaliyotga joriy etish;
madaniy boyliklarning olib kirilishi va olib chiqilishi to‘g‘risidagi qonun hujjatlariga rioya qilinishi va samarali bajarilishini tahlil qilish, ularni takomillashtirish bo‘yicha takliflar ishlab chiqish, shuningdek, xalqaro shartnomalar va umume’tirof etilgan normalarni milliy qonunchilik nuqtai nazaridan atroflicha o‘rganish;
O‘zbekiston tarixi va madaniyatiga oid xorijdagi madaniy boyliklarni ommaviy axborot vositalarida, jumladan, global internet tarmog‘ida keng yoritish, ular haqidagi bibliografik to‘plamlar, kataloglar, kitob-albomlar va boshqa matbaa mahsulotlarini turli tillarda nashr etib borish;
to‘plangan materiallarni mamlakat va jahon miqyosida ilmiy muomalaga kiritish.
Bundan tashqari, O‘zbekistonga oid xorijdagi madaniy boyliklarni tadqiq etish ishlarini muvofiqlashtirish bo‘yicha respublika komissiyasi tuziladi. Uning asosiy vazifalari:
Markaz tomonidan mamlakat tarixi va madaniyatiga oid xorijdagi madaniy boyliklarni tadqiq etish yuzasidan olib boriladigan ilmiy-tadqiqot ishlarini muvofiqlashtirish;
Markazning yillik faoliyat rejasini tasdiqlash va uning amalga oshirilishi uchun ko‘maklashish, shuningdek, zaruratdan kelib chiqqan holda, markazga yuklangan asosiy vazifalar ijrosini ta’minlash maqsadida, markazning taklifiga asosan uning mutaxassislari va boshqa tashkilotlardan markazga jalb qilinadigan ekspertlarni xorijiy davlatlarga safarlarga jo‘natish ishlarini muvofiqlashtirish;
har chorak yakuni bo‘yicha markaz hisobotlarini eshitish, uning faoliyati samarasi va natijadorligini baholash;
mamlakat tarixi va madaniyatiga oid xorijdagi madaniy boyliklarni tadqiq etish bo‘yicha davlat va xo‘jalik boshqaruvi organlari faoliyatini muvofiqlashtirish va bu borada zarur chora-tadbirlarni amalga oshirish.
Markaz quyidagi manbalardan moliyalashtiriladi:
Markazni saqlab turish xarajatlari, shuningdek, 2017-yilda markazning moddiy-texnik bazasini mustahkamlash bilan bog‘liq xarajatlar uchun ajratiladigan davlat budjeti mablag‘lari;
davlat buyurtmasi asosida ilmiy tadqiqotlarni bajarish uchun Fan va texnologiyalar agentligi tomonidan ajratiladigan maqsadli grant mablag‘lari;
Markaz mutaxassislari va boshqa tashkilotlardan unga jalb qilinadigan ekspertlarni xorijiy davlatlarga xizmat safarlariga yuborish va chet ellik mutaxassislar (ekspertlar)ni jalb etish xarajatlari va Markaz faoliyati bilan bog‘liq boshqa xarajatlar uchun tadbirkorlik faoliyatidan, jumladan, noshirlik faoliyatidan tushadigan mablag‘lar, xalqaro moliyaviy institutlar, xorijiy tashkilotlar, donor mamlakatlar va tashkilotlarning grantlari, shuningdek, homiylik xayriyalari va qonun hujjatlarida taqiqlanmagan boshqa manbalar.
Izoh (0)