“Shunqorlar” harbiy-sport musobaqasining respublika bosqichi boshlandi

Jizzax viloyatidagi “Forish” tog‘ dala-o‘quv markazida o‘rta maxsus, kasb-hunar ta’limi muassasalari o‘quvchilari o‘rtasida “Shunqorlar” harbiy-sport musobaqasining yakuniy — respublika bosqichi boshlandi. Bu haqda “Daryo”ga Mudofaa vazirligi matbuot xizmati ma’lum qildi.

Musobaqada Qoraqalpog‘iston Respublikasi, viloyatlar va Toshkent shahridan 14 ta jamoa ishtirok etmoqda. Ular safda yurish va harbiy qo‘shiqlar aytish, harbiy topografiya, ijtimoiy-siyosiy va huquqiy tayyorgarlik, kross, turnikda tortilish, granata uloqtirish, to‘siqlar yo‘lagidan o‘tish, avtomatni ajratish va yig‘ish, pnevmatik quroldan nishonga otish, xorijiy til bilimdoni kabi shartlar bo‘yicha o‘zaro kuch sinashdi.

Yigitlar harbiy-sport bellashuvlari davomida yurt posbonlari uchun yaratilgan shart-sharoitlar, harbiy hayot tarzi, muddatli harbiy xizmatchilarning xizmat haqidagi taassurotlari bilan yaqindan tanishish, komandirlar bilan suhbatlashish imkoniyatiga ega bo‘ladi.

“Jizzax shahridagi ‘Motamsaro ona’ haykali poyiga gul qo‘yish marosimi, Jizzax oliy harbiy aviatsiya bilim yurtiga uyushtirilgan ekskursiya, viloyat Quvnoqlar va zukkolar klubi a’zolari, Samarqand oliy harbiy avtomobil qo‘mondonlik-muhandislik bilim yurti kursantlarining chiqishlari ishtirokchilar yodida qolishi tabiiy”, — deyiladi Mudofaa vazirligi matbuot xizmati xabarida.

Shuningdek, Mudofaa vazirligi Ma’naviyat va ma’rifat markazi mutaxassislari tomonidan o‘tkazilgan Teambuilding jamoaviy o‘yinlari yoshlar qiziqishini oshirdi.