3-iyun kuni soat 16:00 da O‘zbekiston futbol muxlislari klubi xohlovchilarni O‘FF anjumanlar zaliga taklif etadi, deb ma’lumot berdi “Championat.asia” nashri. Yig‘ilishdan maqsad —klubga yangi a’zolarni qabul qilish va uning faoliyati bilan bog‘liq masalalar borasida suhbat o‘tkazish.
O‘zbekiston futbol muxlislari klubi bugungi kunda faoliyat olib borayotgan PFL futbol muxlislari klublari, shuningdek, mamlakatda faoliyatini boshlagan Barcamania, Madridista, Juventus, Chelsea, Arsenal kabi fan-klublarni bir qanot ostida birlashtirishni niyat qilgan. Maqsad — barcha yosh toifasidagi O‘zbekiston terma jamoalarini o‘yinlar paytida qo‘llab-quvvatlash.
O‘FF qoshidagi bu klub o‘zining har bir azosiga shaxsiy ID kartochka (maxsus guvohnoma) taqdim etadi. Uning egasi klubning to‘laqonli a’zosi sifatida bir qator imtiyozlarga ega bo‘ladi: O‘zbekiston milliy terma jamoasi ishtirokidagi barcha rasmiy va o‘rtoklik uchrashuvlarga kirish, terma jamoalarning safar uchrashuvlariga tashrif buyurish uchun bir qator imtiyozlar va hokazo.
ID kartani qo‘lga kiritish uchun oq fondagi 4 dona 3x4 rasm va pasport nusxasi kerak bo‘ladi. Karta 16 yosh va undan kattalarga beriladi. Muxlislar klubiga azolik badal pulini talab qilmaydi.
Batafsil ma’lumotni +99890 1759001 telegram raqamidan yoki shu messenjerdagi @AbdurahmonFazilov manzilidan olish mumkin.
Izoh (0)