O‘zbekiston Oliy va o‘rta maxsus ta’lim vazirligi mutaxassislari O‘zbekiston Prezidentining 2017-yil 18-maydagi № F-4941-sonli farmoyishiga sharh berib o‘tdi. Vazirlik vakilining “Daryo”ga ma’lum qilishicha, qaror ijrosini ta’minlash uchun mamlakatdagi yetuk olimlar, amaliyotchi mutaxassislar, ta’limda ijtimoiy sherikchilik vakillari, zarur sohalar bo‘yicha xorijiy ekspertlarni jalb etiladi. Quyida sharhlar matnini to‘liq keltiramiz.
2017–2021-yillarda O‘zbekiston Respublikasini rivojlantirishning beshta ustuvor yo‘nalishi bo‘yicha Harakatlar strategiyasida belgilangan vazifalarni amalga oshirish, mehnat bozorining talablariga mos yuqori malakali kadrlar tayyorlash siyosatini davom ettirish, ta’lim sifatini baholashning xalqaro standartlarini joriy etish, bu sohada ilm-fan yutuqlarini amaliyotga tatbiq etishning samarali mexanizmlarini yaratish orqali o‘rta maxsus kasb-hunar ta’limi tizimini tubdan isloh qilish maqsadida O‘zbekiston Prezidenti 2017-yil 18-mayda “O‘rta maxsus kasb-hunar ta’limi tizimini yanada rivojlantirish konsepsiyasini ishlab chiqish bo‘yicha Respublika komissiyasini tuzish to‘g‘risida”gi № F-4941-sonli farmoyishga imzo chekdi.
Ushbu farmoyishda o‘rta maxsus kasb-hunar ta’limi tizimini rivojlantirish konsepsiyasini ishlab chiqish bo‘yicha quyidagi yo‘nalishlarda vazifalarga asosiy urg‘u berish nazarda tutiladi:
ish beruvchi korxonalar, ota-onalar, o‘quvchilar va boshqa manfaatdor tomonlar vakillari o‘rtasida ijtimoiy tadqiqotlar o‘tkazish asosida kasb-hunar ta’limi dasturlarini o‘qitish muddati bir yildan to‘rt yilgacha bo‘lgan, universal kasb-hunar ta’lim dasturlaridan chuqur ixtisoslashtirilgan, murakkab ta’lim dasturlarigacha tabaqalashtirish;
kasb-hunar kollejlarini ularda joriy qilinadigan tabaqalashtirilgan ta’lim dasturlari asosida toifalash, tuman (shahar) xaritalarida joylashishini belgilab chiqish, bitiruvchilarni ta’limning keyingi bosqichlarida o‘qishini davom ettirishining huquqiy asoslarini belgilash;
o‘rta maxsus kasb-hunar ta’limi standarti talablarini ta’limning xalqaro standart tasniflagichi, xalqaro kvalifikatsiya ramkalari, professional standartlar talablariga muvofiqligini o‘rganish, tizimni xalqaro andozalar talablariga uyg‘unlashtirish;
o‘rta maxsus kasb-hunar ta’limining tayyorlov yo‘nalishlari, kasblar va ixtisosliklar bo‘yicha umumdavlat tasniflagichini tahlil qilgan holda xizmatchilarning asosiy lavozimlari va ishchilar kasblarining yangilangan tasniflagichiga moslashtirish;
yoshlarning ijtimoiy ong va tafakkurini shakllantirishga, yuqori texnologik muhitda samarali faoliyat olib borishiga, zamonaviy texnologiyalarni yaratish va o‘zlashtirishga asos bo‘lib xizmat qiladigan fanlarga urg‘u berish asosida fanlar sonini optimallashtirish;
ta’lim olish va kasb o‘rganish tamoyili asosida O‘zbekistonda shakllanayotgan tajribani tizimlashtirish, katta yoshdagilarni o‘qitish va ularga hunar o‘rgatish bo‘yicha nodavlat sektorini davlat uzluksiz ta’lim tizimi bilan integratsiyalash;
hududlar bo‘yicha kasb-hunar kollejlariga qabul kvotalarini prognozlashtirishda iqtisodiyotdagi tarkibiy o‘zgarishlar, mehnat bozori konyunkturasini inobatga olgan holda ehtiyojni aniqlash, ishlab chiqarish amaliyotlarini tashkil etish, kollej bitiruvchilarining bandligini ta’minlash, uning monitoringini yuritishda vazirliklar va idoralar o‘rtasida barqaror axborot almashinuvini yo‘lga qo‘yish bo‘yicha yangi tizimni joriy qilish;
olis hududlardagi kasb-hunar kollejlarida mutaxassis tayyorlashda iqtisodiyot ehtiyojlari, ish beruvchilar manfaatlarini inobatga olgan holda o‘quvchi yoshlarning, ayniqsa qizlarning kasb-hunar egallashida ularning kelajak hayoti, oila qurishi, ro‘zg‘or yuritishi, farzandini sog‘lom va barkamol qilib voyaga yetkazishi kabi o‘ta muhim bo‘lgan bilim va ko‘nikmalarni shakllantirishga qaratilgan ta’lim dasturlarini joriy qilish;
ta’lim mazmunini investitsiya loyihalari ko‘lami, yaratilayotgan ish o‘rinlarining yangilangan malaka talablari asosida davriy ravishda takomillashtirib borish mexanizmini yaratish va joriy qilish, yirik investitsiya loyihalari tarkibiga hamkorlikda kadrlar tayyorlash komponentini kiritish;
o‘rta maxsus kasb-hunar ta’limi muassasalarida ta’lim-tarbiya jarayonini tashkil etish va o‘quvchilarning ma’naviy dunyoqarashi shakllanishini tanqidiy o‘rganib chiqish, o‘quvchilarning bilim olish, kasb-hunar o‘rganishga bo‘lgan qiziqishlarining susayib borishi, davomatning pasayishi kabi holatlarni tahlil qilgan holda pedagogik jarayonga yangi shakl va uslublar joriy qilish;
o‘rta maxsus kasb-hunar ta’limi muassasalari o‘quvchilarida kitobxonlik madaniyati shakllanishini rag‘batlantirish mexanizmini ishlab chiqish, mavjud o‘quv adabiyotlarini zamon talablariga moslashtirish, takomillashtirish, mazmunan va shaklan boyitishga qaratilgan qo‘shimcha adabiyotlar yaratish;
o‘qituvchi va ishlab chiqarish ta’limi ustalarini tayyorlash va qayta tayyorlash tizimini hamda ularning malakasini oshirish va qayta tayyorlash bo‘yicha mavjud muassasalar faoliyatini takomillashtirish;
o‘qituvchi va ishlab chiqarish ta’limi ustalarining kasbiy salohiyati va pedagogik mahoratini oshirish, ilg‘or pedagogik va axborot-kommunikatsiya texnologiyalari, xorijiy tillarni o‘zlashtirishni kundalik vazifasiga aylantiradigan yangi mexanizmni yaratish;
o‘rta maxsus kasb-hunar ta’limi muassasalarini zamonaviy axborot-kommunikatsiya texnologiyalari tizimlari hamda zamonaviy kompyuter texnikasi bilan ta’minlash choralarini ko‘rish, o‘qituvchi va o‘quvchilarni ta’lim hamda o‘qitish tizimiga doir statistik, metodik ma’lumotlarni olishga, axborotlar bazasi va zamonaviy axborot-qidiruv tizimlaridan foydalanishga imkoniyatlar yaratish;
kasb-hunar kollejlari o‘quvchilarining tadbirkorlik qobiliyatini aniqlash, mustaqil biznes yuritish sohasidagi fan dasturlarini takomillashtirish;
o‘rta maxsus kasb-hunar ta’limi muassasalarida xalqaro baholash dasturlari asosida o‘quvchilarning umumta’lim fanlari bo‘yicha bilimlarini tashqi baholash dasturlarini joriy qilish;
ta’lim muassasalari zamonaviy o‘quv-laboratoriya jihozlari, asbob-uskuna, texnika bilan ta’minlanganlik darajasi va ularning yaroqlilik holatini o‘rganish natijalari asosida ta’lim muassasalarini zamon talablariga javob beradigan o‘quv-laboratoriya jihozlari, asbob-uskuna, texnika bilan ta’minlash, ularning moddiy-texnik bazasini yanada mustahkamlash.
Yuqorida belgilangan barcha vazifalar bo‘yicha mamlakatdagi yetuk olimlar, amaliyotchi mutaxassislar, ta’limda ijtimoiy sherikchilik vakillari, zarur sohalar bo‘yicha xorijiy ekspertlarni jalb etgan holda ijrosini ta’minlash choralari ko‘riladi.
Izoh (0)