APL “Oltin butsa”si va “Oltin qo‘lqop”i egasini topdi. Afsona Jon Terri 26-daqiqada karyerasiga yakun yasadi

Futbol bo‘yicha Angliya Premyer-ligasida navbatdagi mavsumga yakun yasaldi.

Harri Keyn

Chempionat davomida 29 ta gol urishga muvaffaq bo‘lgan “Tottenhem” hujumchisi Harri Keyn “Oltin butsa” bilan taqdirlandi. Bu borada unga raqobatchilik qilgan “Everton” a’zosi Romelu Lukaku hisobida 25 ta gol bor edi.

Tibo Kurtua

“Chelsi” posboni Tibo Kurtuaga esa “Oltin qo‘lqop” nasib qildi. Belgiyalik posbon bitta mavsumning 16 ta uchrashuvida darvozasidan gol o‘tkazib yubormadi. “Tottenhem” posboni Ugo Lyorisda esa bu ko‘rsatkich 15 taga teng edi.

Antonio Konte

Antonio Konte bilan “Chelsi” super natija qayd etganini e’tirof etish kerak. London klubi mavsumning 30 ta o‘yinida zafar quchib, rekord o‘rnatdi. APL chempioni bo‘lgan klublarning hech biriga bitta mavsumda 30 ta uchrashuvda zafar quchish nasib qilmagandi.

Jon Terri

“Sanderlend”ga qarshi o‘yinda “Chelsi”ning afsonaviy futbolchilaridan biri bo‘lgan Jon Terri karyerasiga yakun yasadi. Uni ramziy ma’noda 26-daqiqada almashtirishdi. Bir necha yillar davomida “Chelsi” himoyasini sardor sifatida qo‘riqlagan Terri 26-raqamli futbolkasida maydonni muxlislar olqishi ostida tark etdi.