Suriyada jangarilar Rossiya elektronikasi qo‘llanilgan qurollardan foydalangan

Suriyalik harbiy mutaxassislar yo‘q qilingan terrorchilarning qurollarini o‘rganib chiqar ekan, IShID va “Jibhat an-Nusra” snayperlari Rossiya korxonalarida ishlab chiqarilgan elektronikali tungi nishonga olish moslamalaridan foydalanishini aniqladi, deb yozadi “Kommersant”.

Snayperlar yog‘dirgan o‘qlar to‘rt nafar rossiyalik harbiyning o‘limiga sababchi bo‘ldi. Jangari deyarli to‘liq qorong‘ilikda bir necha yuz metr masofadan turib o‘q uzgan — u suriyaliklar orasidan rossiyalik instruktorni ajrata olgan va uni yagona o‘q bilan halok qila olgan.

Tungi nishonga olish moslamalari, ekspertlar so‘zlariga ko‘ra, birinchidan uchinchi avlodgacha bo‘lgan turlarga bo‘linadi. Ilk avloddagi moslamalar orqali oy yog‘dusi ostida, ikkinchi avlod moslamalari bilan yulduzlar yorug‘ligi ostida nishonga olish mumkin. So‘nggi nusxalar esa bulutli tunda ham 400 metrdan odamni tanib olish imkonini beradi.

Uchinchi avlod uskunalari AQSh va Rossiyada ishlab chiqariladi. AQShda ularni mamlakatdan tashqariga chiqarish mutlaqo taqiqlangan. Rossiyada ham so‘nggi vaqtlarda shunday qonunchilik amal qilmoqda, ammo mutaxassislar jangarilar qurol-yarog‘lari orasidan aynan Rossiya elektronikasi qo‘llanilgan tungi nishonga olish moslamalarini aniqladi.

IShID ekstremistik guruhi jahonning bir qator mamlakatlari va xalqaro tashkilotlar tomonidan “terrorchilik tashkiloti” deb topilgan.