“O‘zbekiston havo yo‘llari” milliy aviakompaniyasi joriy yil aprel oyidan boshlab Toshkentdan Dushanbega reyslarni amalga oshirishni boshlaydi. Bu haqda “Gazeta.uz” xabar bermoqda.
26-martdan joriy etiluvchi MAK parvozlar jadvaliga muvofiq, reyslar A320 samolyotlarida haftaning seshanba va shanba kunlari amalga oshiriladi.
O‘tgan yil noyabr oyida O‘zbekiston va Tojikiston 2017-yil boshidan 1992-yilda to‘xtatilgan aviaqatnovlarni qaytadan yo‘lga qo‘yishga kelishib olgan edi. Aviareyslarni Tojikiston tomonidan Somon Air, O‘zbekiston tomonidan “O‘zbekiston havo yo‘llari” aviakompaniyalari amalga oshiradi.
Somon Air’ning birinchi reysi 20-fevralga belgilangan edi, biroq tojik aviakompaniyasi zarur hujjatlarni o‘z vaqtida taqdim etmagani sababli parvoz bekor qilindi.
Apreldan “O‘zbekiston havo yo‘llari” Lahorga (Pokiston) ham reyslarni ochadi. Bundan tashqari, Nyu-York, Seul, Mineralniye Vodi, Sochi va Ostonaga parvozlar chastotasi oshiriladi. Dubay, Moskva va Istanbulga parvozlar Boeing-787 Dreamliner laynerlarida amalga oshiriladi. “Daryo”ning Telegram’dagi rasmiy kanali — @toshqindaryo’ga a’zo bo‘ling!
Izoh (0)