“Liverpul” takroriy o‘yinda ham “Sautgempton”dan yengilib, Angliya liga kubogining finalidan quruq qoldi

Taxminlar o‘zini oqlamadi: Yurgen Klopp boshchilik qiladigan “Liverpul” futbol klubi Angliya liga kubogining finalida to‘p surish baxtidan mosuvo bo‘ldi.

“Enfild”da “Sautgempton” futbolchilarini qabul qilgan “Liverpul” safardagi o‘yinda bo‘lgani kabi 0:1 hisobida imkoniyatni boy berdi. “Sent Meris” stadionida uchrashuv taqdirini hal qilgan yagona gol Neytan Redmond tomonidan 20-daqiqada urilgan bo‘lsa, “Liverpul” maydonidagi o‘yinda Sheyn Long “Sautgempton”ni final sari yetaklagan golga mualliflik qildi. Bu paytda bellashuvning 90-daqiqasi o‘tib borayotgandi.

Bugun — 26-yanvar kuni yarim finalning ikkinchi uchrashuvi bo‘lib o‘tadi va unda “Manchester Yunayted” futbolchilari “Xall Siti” maydonida saf tortadi. Tomonlarning “Old Trafford”da kechgan o‘yini “qizil iblislar”ning 2:0 hisobidagi g‘alabasi bilan yakuniga yetgandi.

Angliya liga kubogi Yarim final 25-yanvar, chorshanba

“Liverpul” — “Sautgempton” 0:1

26-yanvar, payshanba“Xall Siti” — “Manchester Yunayted”Dastlabki uchrashuv: 0:2