Gambiya prezidenti mamlakatga Senegal qo‘shinlari kiritilganidan so‘ng, o‘rnini bo‘shatishga rozi bo‘ldi

Gambiyaning amaldagi yetakchisi Yahyo Jamme, Senegal qo‘shinlari Gambiya hududiga kirib kelganidan so‘ng, o‘z o‘rnini mamlakatning yangi saylangan prezidenti Adama Berrouga bo‘shatib berishga rozi bo‘ldi. Bu haqda Berrou Twitter’dagi sahifasida

G‘arbiy Afrika ittifoqi qo‘shinlarining Gambiyaga intervensiyasi 20-yanvar kuni tushda vaqtincha to‘xtatilgan edi. Bu Jamme lavozimni o‘z xohishiga ko‘ra tark etishi uchun berilgan vaqt edi. Oxir-oqibat, Jamme davlat rahbari o‘rnini bo‘shatib, Gambiyani tark etishga rozi bo‘lgan.

Jamme 1994-yildan beri egallab turgan Gambiya prezidenti lavozimini tark etishdan bosh tortgach, mamlakatning yangi saylangan prezidenti Adama Berrou 19-yanvar kuni Senegalda Gambiya prezidenti sifatida qasamyod qilgan edi.

Shundan so‘ng Senegal qurolli kuchlari Adama Berrouni hokimiyatga qaytarish maqsadida Gambiya hududiga kirdi. Bir necha soatdan so‘ng BMT Xavfsizlik kengashi Berrouni Gambiya prezidenti sifatida tan olishini bildiruvchi rezolyutsiyani qabul qildi.

2016-yilning 1-dekabr kuni Jamme Gambiya prezidenti saylovida mag‘lub bo‘lgan, biroq keyinroq lavozimini tark etishdan bosh tortgan edi. 2017-yilning 17-yanvar kuni Jamme Gambiya bo‘ylab 90 kun amal qiluvchi favqulodda holat tartibini e’lon qilgan edi.

Diqqat, diqqat! “Daryo”ning Telegram’dagi rasmiy kanali — “Toshqin ‘Daryo’” (@toshqindaryo)ga obuna bo‘lib, yangiliklardan ovozli ko‘rinishda bahramand bo‘lishingiz mumkin.