Sirdaryo viloyatining Yangiyer shahrida kichik sanoat zonasini tashkil etish rejalashtirilmoqda. Vazirlar Mahkamasi qarorining loyihasi normativ-huquqiy aktlar muhokamasi portalida joylashtirildi, deb xabar beradi “Gazeta.uz”.
Hujjatda ta’kidlanishicha, qaror Yangiyerning sanoat salohiyatini rivojlantirish, investitsiyalar jalb qilish uchun maqbul sharoitlar yaratish va kichik biznes subyektlari tomonidan yangi ishlab chiqarishlarning tashkil etilishi, yangi ish o‘rinlari hamda aholi daromadlarini oshirish maqsadida qabul qilindi.
Sanoat zonasi 30 yil davomida ishlaydi, bu muxlat keyinchalik uzaytirilishi mumkin. Rejaga ko‘ra, bu yerda tekstil, poyabzal, teri-ko‘nchilik, ekologik xavfsiz kimyo, oziq-ovqat, elektr texnik sanoati, qurilish materiallari, oziq-ovqat mahsulotlarini chuqur qayta ishlash va boshqa sohalarda ishlab chiqarishlar tashkil etiladi.
Sanoat zonasi ishtirokchilari yer solig‘i, daromad solig‘i, yuridik shaxslar mulk solig‘i, ijtimoiy infrastrukturani obodonlashtirish va rivojlantirish solig‘i, mikrofirmalar va kichik korxonalar uchun yagona soliq to‘lovidan, shuningdek, Respublika yo‘l jamg‘armasi hamda Moliya vazirligi huzuridagi maktab, kollej, litsey va tibbiyot muassasalarini rekonstruksiya, kapital ta’mirlash va texnik ta’minlash bo‘yicha budjetdan tashkari jamg‘armasiga majburiy to‘lovlardan ozod qilinadi.
Bundan tashqari, ularni Vazirlar Mahkamasi tasdiqlaydigan ro‘yxatlar bo‘yicha ishlab chiqarish ehtiyojlari uchun olib kiriladigan asbob-uskuna, xomashyo, materiallar va butlovchi qismlar, metall konstruksiyalar va qurilish materiallari uchun bojxona to‘lovlaridan (bojxona rasmiylashtirilishi uchun to‘lovlar bunday mustasno) ozod qilish ko‘zda tutilmoqda.
Ko‘rsatilgan imtiyozlar uch yil muxlatga taqdim etiladi, bunda eng kam oylik ish haqining 2 ming barobari miqdoridan kam bo‘lmagan investitsiyalar kiritilishi ko‘zda tutiladi. Agar sanoat zonasi ishtirokchisining yillik tushumi eng kam oylik ish haqining ming barobaridan kam bo‘lsa, imtiyozlar bekor qilinadi.
Izoh (0)