Ertaga — 28-noyabr kuni Namanganning “Navbahor” klubi Oliy Ligada jon saqlab qolish uchun viloyatdoshi “Norin”ga qarshi “final” o‘yinida maydonga tushadi. Bellashuvga Toshkent shahri mezbonlik qiladi.
“Championat.asia” nashri ma’lumotiga ko‘ra, bu o‘yinni o‘tkazish uchun mas’ul hisoblangan O‘zbekiston Professional Futbol Ligasi barcha ishni “Lokomotiv” klubi zimmasiga yuklagan. Bellashuvga “temiryo‘lchilar”ga qarashli bo‘lgan TTYMI stadioni mezbonlik qiladi. To‘p olib beruvchi bolalardan tortib, uchrashuvning qolgan tashkiliy ishlari “Lokomotiv” zimmasida bo‘ladi.
Manbada o‘yinlar vaqtini keragidan ko‘p ko‘chirishni odat qilgan PFL “final” o‘yinini ham Namanganga ko‘chirsa ma’qulroq bo‘lishi keltirib o‘tilgan. Chunki “Navbahor” ham, “Norin” ham Namangan viloyatiga qarashli jamoalar. Uchrashuvning Namanganda bo‘lishi ham harajatni kamroq qilardi, ham u mahalliy muxlislar ko‘z o‘ngida bo‘lib o‘tardi, deb fikr berilgan.
“Lokomotiv”ga qarashli TTYMI stadionidagi Namangan klublari ishtirokidagi o‘yin 13:00 da start oladi. Ish kuni bo‘lgan dushanbada Namangan klublari ishtirokidagi o‘yinni Toshkentda qancha muxlis kuzatib borishi aniq emas. Bellashuvga chiptalar chiqarilgani borasida ham aniq ma’lumot yo‘q.
Izoh (0)