Rossiya—2018 mundiali uchun harakat qilayotgan Osiyo mamlakatlari 3-saralash bosqichining birinchi davrasini yakunladi. 5-turni Seulda Janubiy Koreyaga qarshi o‘tkazgan O‘zbekiston termasi 3-o‘rinni egallab turibdi.
5-turda Xitoy terma jamoasi o‘z maydonida Qatarni qabul qilib, 0:0 hisobida durang o‘ynadi. Xitoyliklar 4-turdan keyin bosh murabbiyni iste’foga chiqarib, uning o‘rniga italiyalik Marchello Lippini olib kelgandi. Shunga qaramay terma jamoa saralashning teng yarmi ortda qolganida ham birorta g‘alabaga erisha olmadi.
Qatarni yangi qabul qilib olgan Xorxe Fossati esa ketma-ket ikki turda 4 ochko ishlashga muvaffaq bo‘ldi. Uning jamoasi hisobidagi 4 ochko bilan turnir jadvalida beshinchi bo‘lib turibdi.
Kunning so‘nggi o‘yinida Suriya va Eron terma jamoalari 0:0 hisobida durang o‘ynadi. Malayziyadagi bellashuv kuchli yomg‘ir sabab belgilangan vaqtidan yarim soat kechroq boshlandi. Urush holati tufayli o‘z maydonida o‘ynay olmayotgan Suriya terma jamoasi guruh yetakchilari bo‘lgan Erondan ham, Janubiy Koreyadan ham 1 tadan ochko tortib olishning uddasidan chiqa oldi.
Izoh (0)