Россия—2018 мундиали учун ҳаракат қилаётган Осиё мамлакатлари 3-саралаш босқичининг биринчи даврасини якунлади. 5-турни Сеулда Жанубий Кореяга қарши ўтказган Ўзбекистон термаси 3-ўринни эгаллаб турибди.
5-турда Хитой терма жамоаси ўз майдонида Қатарни қабул қилиб, 0:0 ҳисобида дуранг ўйнади. Хитойликлар 4-турдан кейин бош мураббийни истеъфога чиқариб, унинг ўрнига италиялик Марчелло Липпини олиб келганди. Шунга қарамай терма жамоа саралашнинг тенг ярми ортда қолганида ҳам бирорта ғалабага эриша олмади.
Қатарни янги қабул қилиб олган Хорхе Фоссати эса кетма-кет икки турда 4 очко ишлашга муваффақ бўлди. Унинг жамоаси ҳисобидаги 4 очко билан турнир жадвалида бешинчи бўлиб турибди.
Куннинг сўнгги ўйинида Сурия ва Эрон терма жамоалари 0:0 ҳисобида дуранг ўйнади. Малайзиядаги беллашув кучли ёмғир сабаб белгиланган вақтидан ярим соат кечроқ бошланди. Уруш ҳолати туфайли ўз майдонида ўйнай олмаётган Сурия терма жамоаси гуруҳ етакчилари бўлган Эрондан ҳам, Жанубий Кореядан ҳам 1 тадан очко тортиб олишнинг уддасидан чиқа олди.
Изоҳ (0)