Hotamjon Ketmonov Namangan viloyati saylovchilari bilan uchrashdi

O‘zbekiston Respublikasi prezidentligiga O‘zbekiston XDPdan ilgari surilayotgan nomzod Hotamjon Ketmonov Namangan viloyatida navbatdagi saylovoldi uchrashuvini o‘tkazdi. Mazkur uchrashuv onlayn video-konferensiya shaklida tashkil etildi. Bu haqda partiya markaziy kengashi matbuot xizmati ma’lum qildi. 

Tadbirda nomzodning ishonchli vakili Hotamjon Ketmonovning tarjimai holi bilan yig‘ilganlarni tanishtirdi. Shundan so‘ng so‘z O‘zbekiston Respublikasi Prezidentligiga nomzod — O‘zXDP markaziy kengashi raisi, Oliy Majlis Qonunchilik palatasi spikerining o‘rinbosari, partiya fraksiyasi rahbari Hotamjon Ketmonovga berildi.

U o‘z saylovoldi dasturining asosiy yo‘nalishlari yuzasidan yig‘ilganlarga batafsil ma’lumot berdi. Dastur partiyaning g‘oya va maqsadlariga tayanishi, xususan, Oliy Majlis Qonunchilik palatasidagi O‘zXDP fraksiyasining parlamentdagi ko‘pchilik — demokratik kuchlar blokiga nisbatan o‘zini muxolifat deb e’lon qilgani, shu bois muxolif fraksiya sifatida ilgari surilgan qator g‘oyalarga asoslanishi ta’kidlandi.

Munosib ish haqi to‘lanadigan barqaror ish o‘rinlarini yaratish, birinchi navbatda, mineral xomashyo resurslari va qishloq xo‘jaligi mahsulotlarini qayta ishlashni ta’minlovchi yuqori texnologik tarmoq korxonalari, xizmat ko‘rsatish va servis sohasida faoliyat yuritayotgan korxona va tashkilotlarda mehnatga layoqatli aholi bandligini ta’minlash bo‘yicha sa’y-harakatlarni faollashtirish, ushbu sohalarga mamlakatda mavjud bo‘lgan bo‘sh mehnat resurslarini faol jalb etish masalalariga dasturda ustuvorlik berilmoqda.

Saylovoldi dasturida mahalliy mahsulot hisobiga ichki bozorni to‘ldirish, narx-navo oshishining oldini olish, tovarlar va xizmatlar ishlab chiqarishni rivojlantirish hududiy dasturlarini ishlab chiqish hamda amalga oshirish borasida mahalliy davlat hokimiyati, boshqaruv organlari mas’uliyatini kuchaytirish masalasiga ham alohida e’tibor qaratildi.

Uchrashuv davomida ma’ruza yuzasidan bir qator ishtirokchilar so‘zga chiqdi. Saylovchilar o‘zlarini qiziqtirgan savollarga nomzod va uning ishonchli vakillaridan atroflicha javob olish imkoniga ega bo‘ldi.