Toshkentda “Media, reklama va zamonaviy texnologiyalar” xalqaro forumi o‘z ishini boshladi. Bu haqda “Daryo”ga tadbir mutasaddilari ma’lum qildi.
Forum doirasida mass-media, reklama va marketingga oid ko‘plab mavzular, jumladan, global va mahalliy mediasanoatni rivojlantirish istiqbollari; distributsiya tamoyillari va xalqaro TV-kontentning lokal adaptatsiyasi; media-kontentni shakllantirish va tezkor yetkazish sohasidagi innovatsion yechimlar; teleauditoriyani o‘lchash va tomoshabinlar istagini aniqlash xususiyatlari; reklama-marketing strategiyasining asosiy trendlari va nostandart usullari; media agentliklarining bugungi kundagi faoliyati muhokama qilinishi rejalashtirilgan.
Tadbirda teleradiokompaniyalar va boshqa mass-medialar, reklama va kreativ agentliklari, kabel, raqamli va sun’iy yo‘ldosh operatorlarining rahbarlari va yetakchi mutaxassislari, dasturiy ta’minot va telekommunikatsiya uskunalari ishlab chiqaruvchilar, media-kontent prodyuserlari va distribyutorlari, shuningdek, tovarlar va xizmatlar ko‘rsatuvchi kompaniyalarning marketing, reklama va jamoatchilik bilan aloqalar bo‘yicha xodimlari qatnashmoqda.
Forumda obro‘li xalqaro ekspertlar — Reuters, FremantleMedia Group, SARAN MEDIA, Sony Electronics, Huawei, TNS Central Asia iTRAM vakillari auditoriya bilan o‘z tajriba va fikrlarini o‘rtoqlashadi. Umumiy hisobda forumda O‘zbekiston, Buyuk Britaniya, Xitoy, Isroil, Shveysariya, Rossiya, Qozog‘iston va Turkiyadan 200 dan ortiq delegat ishtirok etmoqda.
Qatnashchilarga o‘zaro hamkorlikning turli shakllari, ya’ni sho‘ba yig‘ilishlari, bahslar, savol-javoblar va maxsus tashkil etilgan “Tanishuvlar sessiyasi” ko‘rgazmasi taklif etiladi. Ko‘rgazma davomida kompaniyalar o‘z xizmatlari va mahsulotlarini boshqa ishtirokchilar e’tiboriga havola qilishlari va ular orasidan potensial hamkorlar – agentlar, buyurtmachilar yoki pudratchilarni topishlari mumkin bo‘ladi.
Forum tashkilotchisi SAIPRO axborot-reyting agentligi bo‘lib, unga O‘zbekiston Respublikasi axborot texnologiyalarini rivojlantirish va kommunikatsiyalar vazirligi, Xususiylashtirish, monopoliyadan chiqarish va raqobatni kuchaytirish davlat qo‘mitasi hamda Elektron ommaviy axborot vositalari milliy assotsiatsiyasi ko‘mak bermoqda.
Izoh (0)