Toshkentdagi “Zarqaynar” majmuasida 10–12-noyabr kunlari o‘tkaziladigan “Oltin kuz–2016” mavsumiy zamonaviy liboslar ko‘rgazmasiga bag‘ishlangan matbuot anjumani tashkil etildi. Bu haqda O‘zA xabar bermoqda.
Unda turli vazirlik va idoralar, xalqaro tashkilotlar vakillari, madaniyat va san’at namoyandalari, dizayner va rassomlar, jurnalistlar hamda yoshlar ishtirok etdi.
Ushbu o‘ziga xos ko‘rgazma milliy moda va moda sanoatini yanada rivojlantirish, yangi nomlarni kashf etish, yosh dizaynerlarga keng imkoniyatlar yaratish, yangi-yangi matolar va aksessuarlar ishlab chiqarishga qaratilgan. Yangi sanoat kolleksiyalarini yaratish maqsadida Yevropa va Osiyoning yetakchi dizayn maktablari va kompaniyalari yangiliklarini an’anaviy o‘zbek dizayn maktabi bilan uyg‘unlashtirish xalqaro festivalning asosiy konsepsiyasiga aylangan.
Ko‘rgazmani o‘tkazishdan maqsad mamlakatda zamonaviy va faol rivojlanayotgan modalar industriyasi va yangi modalar tendensiyasi bilan moda ixlosmandlarini yaqindan tanishtirish, to‘qimachilik va yengil sanoat yangiliklaridan boxabar qilish, tayyor liboslarda to‘qimachilik ashyosi va uning an’anaviy milliy matolar bilan konstruktiv birikmalarini ishlab chiqarish sohasidagi yangi yondashuvlar haqida atroflicha ma’lumot berishdan iborat.
Ko‘rgazmada O‘zbekiston hamda MDH davlatlaridan kelgan o‘ttizdan ziyod mohir dizaynerlarning ishtirok etishi kutilmoqda. Ular ishtirokida tashkil etiladigan seminar-treninglarda mamlakat modelyer va stilistlari, moda sanoatining boshqa vakillari sohaning taniqli ustalari bilan muloqot qilish, o‘zlarini qiziqtirgan savollarga javob olish imkoniyatiga ega bo‘ladi.
Uch kun davom etadigan tadbirda taniqli modelyerlar, MDH davlatlaridan kelgan dizaynerlar, Toshkent shahar havaskor modelyerlar va tikuvchilar assotsiatsiyasi a’zolarining kolleksiyalari namoyish etiladi.
Ko‘rgazma doirasida o‘tkaziladigan mahorat saboqlari yuqori malakali mutaxassislar tajribasini o‘rganish, fikr almashish imkonini beradi. Ko‘rgazmaning birinchi kunida O‘zbekistonning taniqli dizaynerlari tomonidan yaratilgan erkaklar va ayollarning liboslari namoyish etiladi. Ikkinchi kun bolalar uchun mo‘ljallangan Street Style kolleksiyasi namoyish qilinadi. Uchinchi kun modalar ko‘rgazmasi ishtirokchilarini taqdirlash marosimi bo‘ladi.
Ko‘rgazma doirasida O‘zbekiston va dunyo modasi haqida hikoya qiluvchi onlayn jurnal — yangi media-loyiha taqdimoti bo‘lib o‘tadi. “Yilning eng yaxshi dizayneri”, “Yilning eng yaxshi yosh dizayneri”, “Yilning eng yaxshi modeli”, “Yilning eng yaxshi mini-modeli” nominatsiyalari bo‘yicha g‘oliblar aniqlanadi.
Izoh (0)