Тошкентдаги «Зарқайнар» мажмуасида 10–12 ноябрь кунлари ўтказиладиган «Олтин куз–2016» мавсумий замонавий либослар кўргазмасига бағишланган матбуот анжумани ташкил этилди. Бу ҳақда ЎзА хабар бермоқда.
Унда турли вазирлик ва идоралар, халқаро ташкилотлар вакиллари, маданият ва санъат намояндалари, дизайнер ва рассомлар, журналистлар ҳамда ёшлар иштирок этди.
Ушбу ўзига хос кўргазма миллий мода ва мода саноатини янада ривожлантириш, янги номларни кашф этиш, ёш дизайнерларга кенг имкониятлар яратиш, янги-янги матолар ва аксессуарлар ишлаб чиқаришга қаратилган. Янги саноат коллекцияларини яратиш мақсадида Европа ва Осиёнинг етакчи дизайн мактаблари ва компаниялари янгиликларини анъанавий ўзбек дизайн мактаби билан уйғунлаштириш халқаро фестивалнинг асосий концепциясига айланган.
Кўргазмани ўтказишдан мақсад мамлакатда замонавий ва фаол ривожланаётган модалар индустрияси ва янги модалар тенденцияси билан мода ихлосмандларини яқиндан таништириш, тўқимачилик ва енгил саноат янгиликларидан бохабар қилиш, тайёр либосларда тўқимачилик ашёси ва унинг анъанавий миллий матолар билан конструктив бирикмаларини ишлаб чиқариш соҳасидаги янги ёндашувлар ҳақида атрофлича маълумот беришдан иборат.
Кўргазмада Ўзбекистон ҳамда МДҲ давлатларидан келган ўттиздан зиёд моҳир дизайнерларнинг иштирок этиши кутилмоқда. Улар иштирокида ташкил этиладиган семинар-тренингларда мамлакат модельер ва стилистлари, мода саноатининг бошқа вакиллари соҳанинг таниқли усталари билан мулоқот қилиш, ўзларини қизиқтирган саволларга жавоб олиш имкониятига эга бўлади.
Уч кун давом этадиган тадбирда таниқли модельерлар, МДҲ давлатларидан келган дизайнерлар, Тошкент шаҳар ҳаваскор модельерлар ва тикувчилар ассоциацияси аъзоларининг коллекциялари намойиш этилади.
Кўргазма доирасида ўтказиладиган маҳорат сабоқлари юқори малакали мутахассислар тажрибасини ўрганиш, фикр алмашиш имконини беради. Кўргазманинг биринчи кунида Ўзбекистоннинг таниқли дизайнерлари томонидан яратилган эркаклар ва аёлларнинг либослари намойиш этилади. Иккинчи кун болалар учун мўлжалланган Street Style коллекцияси намойиш қилинади. Учинчи кун модалар кўргазмаси иштирокчиларини тақдирлаш маросими бўлади.
Кўргазма доирасида Ўзбекистон ва дунё модаси ҳақида ҳикоя қилувчи онлайн журнал — янги медиа-лойиҳа тақдимоти бўлиб ўтади. «Йилнинг энг яхши дизайнери», «Йилнинг энг яхши ёш дизайнери», «Йилнинг энг яхши модели», «Йилнинг энг яхши мини-модели» номинациялари бўйича ғолиблар аниқланади.
Изоҳ (0)