www.uzfootball.uz domenida faoliyat olib boruvchi va O‘zbekiston milliy terma jamoasining 1992-yildan buyon o‘tkazib keladigan barcha o‘yinlari statistikasini o‘zida aks ettirgan sayt faoliyatini tugatdi.
“Muhtaram futbol muxlislari! O‘zbekiston terma jamoasining faoliyatiga bag‘ishlangan uzfootball.uz sayti o‘z faoliyatini tugatishini ma’lum qilaman”, — deb yozib qo‘yilgan saytning kirish qismiga.
“2008-yilda ochilgan bu saytda terma jamoamiz faoliyatiga oid statistik ma’lumotlarni baholi qudrat to‘plab, sizning e’tiboringizga havola qilib kelayotgan edim. Bu borada faqat o‘zimning bilim va mablag‘larim, harakatimga tayandim, futbol muxlislari uchun barcha ma’lumotlarni beg‘araz taqdim qildim. Endilikda, saytni yuritish, uni ma’lumotlar bilan to‘ldirish, bunga vaqt va mablag‘ topish borasida qiyinchilikka duch kelmoqdaman. Shu sababli ham sayt faoliyatini tugatishga qaror qildim”, — deb tushuntirish bergan uning muallifi.
Ma’lumot uchun, O‘zbekiston milliy terma jamoasining barcha statistik ma’lumotlarini o‘zida aks ettirgan, unda qanday murabbiylar faoliyat olib borgani, qaysi futbolchi qancha o‘yin o‘tkazgan va nechta gol urgani borasidagi ma’lumotlarni taqdim etuvchi boshqa internet nashr mavjud emas.
Izoh (0)