www.uzfootball.uz доменида фаолият олиб борувчи ва Ўзбекистон миллий терма жамоасининг 1992 йилдан буён ўтказиб келадиган барча ўйинлари статистикасини ўзида акс эттирган сайт фаолиятини тугатди.
«Муҳтарам футбол мухлислари! Ўзбекистон терма жамоасининг фаолиятига бағишланган uzfootball.uz сайти ўз фаолиятини тугатишини маълум қиламан», — деб ёзиб қўйилган сайтнинг кириш қисмига.
«2008 йилда очилган бу сайтда терма жамоамиз фаолиятига оид статистик маълумотларни баҳоли қудрат тўплаб, сизнинг эътиборингизга ҳавола қилиб келаётган эдим. Бу борада фақат ўзимнинг билим ва маблағларим, ҳаракатимга таяндим, футбол мухлислари учун барча маълумотларни беғараз тақдим қилдим. Эндиликда, сайтни юритиш, уни маълумотлар билан тўлдириш, бунга вақт ва маблағ топиш борасида қийинчиликка дуч келмоқдаман. Шу сабабли ҳам сайт фаолиятини тугатишга қарор қилдим», — деб тушунтириш берган унинг муаллифи.
Маълумот учун, Ўзбекистон миллий терма жамоасининг барча статистик маълумотларини ўзида акс эттирган, унда қандай мураббийлар фаолият олиб боргани, қайси футболчи қанча ўйин ўтказган ва нечта гол ургани борасидаги маълумотларни тақдим этувчи бошқа интернет нашр мавжуд эмас.
Изоҳ (0)