20-oktabr kuni Toshkentdagi Inha universiteti “Angren” maxsus industrial zonasi bilan anglashuv memorandumini imzoladi. Hujjatni universitet rektori Sherzod Shermatov va “Angren” MIZ direksiyasi rahbari Sohib Saifnazarov imzoladi, deb xabar beradi universitet matbuot xizmati.
Tomonlar memorandum doirasida to‘rt yo‘nalishi bo‘yicha hamkorlik qilishga kelishib oldi. Jumladan, Toshkent shahridagi Inha universiteti va “Angren” maxsus industrial zonasi direksiyasi hamkorlikda iqtidorli talabalar uchun grantlar dasturini tushirishi mumkin.
Toshkent shahridagi Inha universiteti hamda “Angren” MIZ universitet talabalarini jalb etgan holda zonada faoliyat yuritayotgan korxonalar faoliyatini rivojlantirish va targ‘ib etishga yo‘naltirilgan dasturiy mahsulotlarni ishlab chiqish, tatbiq etish va qo‘llab-quvvatlash hamda keyinchalik yanada takomillashtirishga, talabalarning amaliy ko‘nikmalarini mustahkamlashga kelishib oldi.
Tomonlar, shuningdek, “Angren” MIZda faoliyat yurituvchi korxonalarda innovatsion yechimlarni tatbiq etish bo‘yicha hamkorlikdagi loyihalarni amalga oshirish, mobil banking va internetni rivojlantirish yo‘nalishlarida innovatsion yechimlarni tatbiq etish borasida ham hamkorlik qiladi.
Ikki tashkilot o‘rtasidagi hamkorlikning yana bir yo‘nalishi sifatida zamonaviy axborot-kommunikatsiya texnologiyalarini kompleks tatbiq etish va ulardan samarali foydalanish bo‘yicha “Angren” MIZ direksiya xodimlarini o‘qitish va malakasini oshirish yo‘nalishini ko‘rsatish mumkin.
O‘qitish dasturi mazkur sohadagi yetakchi mutaxassis-amaliyotchilar orasidan tanlab olingan tajribali ma’ruzachi va murabbiylarni jalb etgan holda tashkillashtiriladi. O‘quv dasturi, shuningdek, tizimli tahlil ko‘nikmalarini, IT-loyihalarini tatbiq etish hamda axborot tizimlarini loyihalashtirishda muddat va resurs cheklovlarini inobatga olish malakasini shakllantirishga qaratilgan.
Izoh (0)