Rossiya Sport vazirligida muassasa bosh vaziri o‘rinbosari Pavel Kolobkov raisligi ostida ishchi guruhning yig‘ilishi bo‘lib o‘tdi. Unda 4-oktabr kuni Grozniy shahrida o‘tkazilgan MMA Grand Prix Akhmat 2016 turnirining qonuniyligi ko‘rib chiqildi, deb xabar bermoqda “Vedomosti”.
Yig‘ilishda Rossiya Sport vazirligi, Checheniston Jismoniy tarbiya va sport vazirligi, Rossiya Aralash janglar san’ati (MMA) ittifoqi hamda Butun Rossiya “MMA ittifoqi” jamoat tashkiloti va boshqa tizim vakillari ishtirok etdi.
Ishchi guruh Grozniyda o‘tkazilgan turnirda 18 yosh va undan katta bo‘lgan kurashchilar ishtirokidagi janglar qoidalarga muvofiq o‘tdi, degan xulosaga keldi. Ammo 10 yoshgacha bo‘lgan bolalarning Grand Prix Akhmat 2016 turniri doirasida ko‘rgazmali janglari MMA qoidalariga zid ekani tan olindi.
Bundan tashqari, ishchi guruh Grand Prix Akhmat 2016 turniri rasmiy musobaqa bo‘lmagan, degan xulosaga keldi.
“Turnir Rossiya Sport vazirligi va Butun Rossiya ‘MMA ittifoqi’ jamoat tashkiloti bilan kelishilmagan holda o‘tkazildi hamda mamlakatning 2016-yilgi sport tadbirlari taqvimidan o‘rin olmagan edi”, – deyiladi xabarda.
Turnir, shuningdek, Checheniston sport musobaqalari va jismoniy tarbiya tadbirlari taqvimidan ham o‘rin olmagan.
Checheniston Jismoniy tarbiya va sport vazirligiga kelajakda bahsli vaziyatlarga sababchi bo‘lmaslik uchun Rossiya Sport vazirligi va mamlakat sport federatsiyalari bilan kelishilgan holda shunga o‘xshash turnirlarni o‘tkazish tavsiya etildi.
Izoh (0)