Avstraliyada sigir juda yaqiniga uchib kelgan vertolyotni urib yubordi

Avstraliyaning Kvinslend shtati shimolida sigir bilan to‘qnashib ketish oqibatida Robinson R22 vertolyoti halokatga uchradi. Bu haqda Brisbane Times nashri ma’lum qildi, deb xabar bermoqda TJournal.

Hodisa Koen shahri janubida yuz berdi. Nashrning ma’lum qilishicha, ikki o‘rinli vertolyotning uchuvchisi o‘ziga qarashli sigirlar podasini juda yaqinidan uchib o‘tgan va “chang‘isi” (relslar ko‘rinishidagi shassi) bilan ulardan birining shoxiga ilinib qolgan.

Uchuvchi hayvonni ozod qilishga uringan, oqibatda boshqaruvni yo‘qotgan.

Vertolyot yerga qattiq qo‘ngan, shundan so‘ng tezda yonib ketgan. O‘t o‘chiruvchilar uchish qurilmasini o‘chirishga erishgan, biroq bu vaqtga kelib u to‘liq vayron bo‘lgan.

Shtat politsiyasi hodisa yuzasidan surishtiruv olib bormoqda. Avariya oqibatida uchuvchiga ham, sigirga ham zarar yetmagan.

Avstraliyada katta hududlarga yoyilib ketgan sigirlarni uyga haydab kiritish uchun Robinson R22 kabi yengil vertolyotlardan tez-tez foydalaniladi.

Diqqat, diqqat! “Daryo”ning Telegram’dagi rasmiy kanali — “Toshqin ‘Daryo’”ga obuna bo‘lib, yangiliklardan ovozli ko‘rinishda bahramand bo‘lishingiz mumkin.