Aktyor Pol Uoker notanish juftlik uchun 9 ming dollarlik uzuk xarid qilgani haqidagi voqea oshkor etildi

AdMe marhum aktyor, “Forsaj” kinofranshizasi yulduzi Pol Uoker bilan bog‘liq ta’sirli voqeani hikoya qilib berdi.

2004-yilda Kayl Apxem va uning o‘sha paytdagi qaylig‘i, hozirgi rafiqasi Kristen Santa-Barbaraning zargarlik do‘konlaridan birida brilliant ko‘zli uzuk qidirayotgan edi. Ulardan tashqari, do‘konda yana bir xaridor bor edi, lekin juftlik unga e’tibor qaratmadi.

Erkak Kayl va Kristenga qimmatroq buyumlarni ko‘rishni maslahat berdi, ammo juftlik bunga puli yetmasligini tan oldi. Suhbatdan so‘ng ular nihoyat Pol Uokerni tanidi. Kayl aktyorga armiyada xizmat qilgani va yaqinda ikkinchi marta Iroqqa ketishi haqida aytib berdi. Safardan oldin Kayl bo‘lajak turmush o‘rtog‘iga uzuk sovg‘a qilishni istagan edi.

Kristenning eslashicha, Kaylning askarligini eshitgan Polning yuzi o‘zgardi. O‘sha kuni juftlik hech narsani tushunmay, do‘konni tark etdi. Yoshlar hech narsa sotib olmadi — brilliant ko‘zli uzuklar ularga qimmatlik qildi.

Ammo tez orada ular kutmagan ish bo‘ldi: do‘kon xodimi qo‘ng‘iroq qilib, ulardan 9 ming dollarlik uzukni olib ketishni so‘radi. Uzuk pulini noma’lum kishi to‘lagan edi. Yoshlar buni bilishga harakat qildi, ammo do‘kon xodimlari bu odam kim ekanligini oshkor etmadi.

Haqiqat 2013-yilda yuzaga chiqdi. Pol Uokerning o‘limidan so‘ng do‘kon xodimi Ayrin King buni sir tutishdan ortiq foyda yo‘qligini tushundi va barini aytib berdi.

Ayrinning so‘zlariga qaraganda, aktyor qiz uzuklardan birini juda yoqtirib qolganini payqadi. Shu bilan birga, Kayl bu uzukni sotib olib bera olmas edi — Pol buni ham ko‘rdi. Shunda aktyor uzukni o‘zi sotib olib, juftlikka bir necha kundan so‘ng taqdim etishni so‘radi. O‘z nomini Uoker sir saqladi. Uoker o‘z hayotini xavf ostiga qo‘yayotgan harbiy keliniga uzuk sotib olib bera olmasligidan juda ranjib, bu adolatsizlikni bartaraf etishga qaror qildi.

Shu tariqa Kayl va Kristen Uoker ularga yaxshilik qilganini bilib oldi.

“Bu men olgan eng saxiy sovg‘a bo‘ldi. Biz bu uzukni va uning tarixini avloddan avlodga o‘tkazamiz”, — dedi Kristen.