Актёр Пол Уокер нотаниш жуфтлик учун 9 минг долларлик узук харид қилгани ҳақидаги воқеа ошкор этилди

AdMe марҳум актёр, «Форсаж» кинофраншизаси юлдузи Пол Уокер билан боғлиқ таъсирли воқеани ҳикоя қилиб берди.

2004 йилда Кайл Апхем ва унинг ўша пайтдаги қайлиғи, ҳозирги рафиқаси Кристен Санта-Барбаранинг заргарлик дўконларидан бирида бриллиант кўзли узук қидираётган эди. Улардан ташқари, дўконда яна бир харидор бор эди, лекин жуфтлик унга эътибор қаратмади.

Эркак Кайл ва Кристенга қимматроқ буюмларни кўришни маслаҳат берди, аммо жуфтлик бунга пули етмаслигини тан олди. Суҳбатдан сўнг улар ниҳоят Пол Уокерни таниди. Кайл актёрга армияда хизмат қилгани ва яқинда иккинчи марта Ироққа кетиши ҳақида айтиб берди. Сафардан олдин Кайл бўлажак турмуш ўртоғига узук совға қилишни истаган эди.

Кристеннинг эслашича, Кайлнинг аскарлигини эшитган Полнинг юзи ўзгарди. Ўша куни жуфтлик ҳеч нарсани тушунмай, дўконни тарк этди. Ёшлар ҳеч нарса сотиб олмади — бриллиант кўзли узуклар уларга қимматлик қилди.

Аммо тез орада улар кутмаган иш бўлди: дўкон ходими қўнғироқ қилиб, улардан 9 минг долларлик узукни олиб кетишни сўради. Узук пулини номаълум киши тўлаган эди. Ёшлар буни билишга ҳаракат қилди, аммо дўкон ходимлари бу одам ким эканлигини ошкор этмади.

Ҳақиқат 2013 йилда юзага чиқди. Пол Уокернинг ўлимидан сўнг дўкон ходими Айрин Кинг буни сир тутишдан ортиқ фойда йўқлигини тушунди ва барини айтиб берди.

Айриннинг сўзларига қараганда, актёр қиз узуклардан бирини жуда ёқтириб қолганини пайқади. Шу билан бирга, Кайл бу узукни сотиб олиб бера олмас эди — Пол буни ҳам кўрди. Шунда актёр узукни ўзи сотиб олиб, жуфтликка бир неча кундан сўнг тақдим этишни сўради. Ўз номини Уокер сир сақлади. Уокер ўз ҳаётини хавф остига қўяётган ҳарбий келинига узук сотиб олиб бера олмаслигидан жуда ранжиб, бу адолатсизликни бартараф этишга қарор қилди.

Шу тариқа Кайл ва Кристен Уокер уларга яхшилик қилганини билиб олди.

«Бу мен олган энг сахий совға бўлди. Биз бу узукни ва унинг тарихини авлоддан авлодга ўтказамиз», — деди Кристен.